Idman.biz
Almaniyanın Reyn-Rur bölgəsində keçirilən Universiadanın başlanmasından düz bir həftə ötür. Azərbaycan komandasının hesabında bədii gimnastikada qazanılmış iki qızıl və bir gümüş medal var. Lakin qarşıdakı beş gün ərzində idmançılarımızın bu uğurları davam etdirəcəyi və mükafat kolleksiyasını genişləndirəcəkləri üçün ciddi əsaslar mövcuddur.
İdman.biz-in Almaniyaya ezam olunmuş əməkdaşı xəbər verir ki, gimnastlar ümumi komandaya nümunə oldular.
Maraqlıdır ki, bu komanda tarixində ilk dəfə tələbələrin oyunlarında iştirak edir və debüt sözün əsl mənasında "qızıl" alındı: çoxnövçülük və beş lentlə hərəkətlərdə qələbə və üç top, iki halqa ilə kompozisiyada isə gümüş medal. Güllü Ağalarzadə, Darya Sorokina, Ləman Əlimuradova, Kamilla Əliyeva və Yelizaveta Luzandan ibarət komanda üçün bu medallar həm yaddaqalan, həm də motivasiyaedici oldu. Şübhəsiz ki, Almaniyadakı bu uğur Rio-de-Janeyroda keçiriləcək dünya çempionatı öncəsi onlara əlavə inam aşılayacaq.
Gimnastların startından sonra müəyyən nəticələr tekvondoçulardan gözlənilirdi. Lakin idmançılarımızın əksəriyyəti gözləntiləri doğrultmadı. Fərdi yarışlarda son medal ümidi olan Eltac Qafarov (87 kq) 1/4 finalda ukraynalı Artyom Xarbara məğlub oldu. Həmçinin Həmidreza Badrialiabadi (+87 kq) və Taleh Süleymanov (80 kq) da eyni mərhələdə yarışa əlvida dedilər. Bu baxımdan, tekvondo komandası mümkün medallardan kənarda qaldı.
İndi əsas ümidlərimiz cüdoya yönəlib və yarışlar sabahdan başlayır. Bu mənada qarşıdakı günlər medal sıralamasında komandanın mövqeyini ciddi şəkildə gücləndirə bilər. Hazırda Azərbaycan ilk "onluğ"un astanasındadır. Cüdo komandasının lideri Elcan Hacıyev üçün isə Universiadadakı uğur dünya çempionatında qazandığı bürünc medaldan sonra əhəmiyyətli motivasiya ola bilər.
Universiadanın təşkili məsələsinə gəlincə, ümumilikdə qənaətbəxşdir. Lakin bəzi texniki uyğunsuzluqlar, xüsusilə media ilə iş prosesində nəzərə çarpır. Məsələn, gimnastların final günündə bizi tribunaya buraxmaq istəmirdilər – nə multiforum təşkilatçıları, nə də təhlükəsizlik əməkdaşları. Onlar bütün biletlərin satıldığını əsas gətirirdilər. Jurnalist olduğumuzu və akreditasiyanın kifayət etdiyini izah etmək üçün bir neçə dəfə sektorları dolaşıb vaxt sərf etməli olduq. Sonradan təşkilatçılar bunu "texniki səhv" kimi izah edib üzr istədilər, amma artıq gec idi.
Almaniyada hava da bizə yaxşı münasibət göstərmir. Tez-tez yağış yağır, hava tutqun keçir və temperaturda kəskin dəyişikliklər olur. Amma Azərbaycan jurnalistləri üçün bu, yad deyil. Həm də yarışlar hər havada davam edir – hətta çimərlik voleybolu da öz ritmində keçir.
İşimizə davam edirik...
Zəki Feyzullayev, Essendən (Almaniya)
İdman.biz
