Idman.biz
"Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı"nın icrası çərçivəsində ötən ilin sonlarında Naxçıvan şəhərinin müxtəlif ərazilərində, 8 yerdə sadə tipli açıq hava idman qurğuları əhalinin istifadəsinə verilib.
İdman.biz xəbər verir ki, bunu jurnalistlərə müsahibəsində Naxçıvan Muxtar Respublikası Gənclər və İdman Nazirliyinin mətbuat və ictimaiyyətlə əlaqələr üzrə baş məsləhətçisi Emil Səmədov deyib.
O bildirib ki, Dövlət Proqramının 2025–2027-ci illər üzrə Təfsilatlı Tədbirlər Planına əsasən, həmin infrastruktur layihəsinin icrası ilə əlaqədar bu ilin sonunadək daha 11 yerdə olmaqla, muxtar respublikanın bütün rayonlarında idman qurğuları quraşdırılacaq: "Konkret desək, Şərur və Ordubad şəhərlərinin hər birində 2, Babək, Culfa və Şahbuz şəhərlərinin hər birində 1, o cümlədən Sədərək rayonunun Heydərabad, Kəngərli rayonunun Qıvraq, Babək rayonunun Cəhri və Nehrəm qəsəbələrinin hər birində 1 yerdə açıq hava idman qurğuları quraşdırılacaq. Əsas hədəflərdən biri də bütün bölgələrdə bərabər idman imkanları yaratmaqdır. Artıq yerli icra hakimiyyətləri ilə razılaşma əsasında ərazilər müəyyənləşdirilib, layihələndirmə və ilkin qiymətləndirmə aparılaraq dövlət satınalması proseduru başlayıb. Prosesin gedişatına uyğun olaraq, inşaat işlərinin iyul ayının sonlarında başlanması nəzərdə tutulub".
"Hesab edirik ki, dövlətimizin birbaşa həyata keçirdiyi və yaxından dəstək olduğu bu layihələr muxtar respublikanın idman mühitinə əlavə dəyər qatacaq, bədən tərbiyəsi və idmanın inkişafına təkan verəcək, ümumilikdə əhalinin sağlam həyat tərzinə sövq edilməsinə, gənclərin asudə vaxtının səmərəli təşkilinə və fiziki hazırlığının yüksəlməsinə mühüm töhfə olacaq" - deyə Emil Səmədov əlavə edib.
İdman.biz
