Idman.biz
Hindistan əsilli 11 yaşlı britaniyalı şahmatçı Bodhana Şivanandan Monteneqronun Budva şəhərində keçirilən Avropa Klublar Kubokunun son turunda yeni dünya rekorduna imza ata bilər.
Idman.Biz The Guardian nəşrinə istinadən xəbər verir ki, gənc idmançı şahmat tarixində beynəlxalq usta (IM) adını qazanan ən gənc qadın olmaq şansına malikdir. Bunun üçün onun oktyabrın 23-də keçiriləcək sonuncu partiyada uğur qazanması lazımdır.
Şivanandan artıq beynəlxalq usta adı üçün tələb olunan iki normanı yerinə yetirib. Son turda qələbə ona üçüncü və həlledici normanı tamamlamaqla yanaşı, IM adı üçün zəruri reytinq həddinə çatmaq imkanı verəcək.
Britaniyalı şahmatçı yarışın üçüncü turunda beynəlxalq ustanı məğlub edərək həmin vaxt canlı reytinqini 2399,4 xala yüksəldib. Açıq kateqoriya üzrə beynəlxalq usta adını qazanmaq üçün isə 2400 reytinq həddinə çatmaq tələb olunur.
Daha sonra Şivanandan The Guardian-ın məlumatına görə, 2426 reytinq xalına malik gürcüstanlı qrossmeyster Nino Batsiaşvili ilə heç-heçə oynayıb. Maraqlıdır ki, 11 yaşlı şahmatçı bu görüşdə üstün mövqeyə sahib olub və qələbə qazanmaq imkanını əldən verib.
Bodhana ilk turda dünya çempionluğu uğrunda matçın sabiq iştirakçısı, rusiyalı qrossmeyster Aleksandra Qoryaçkinaya qarşı da ciddi müqavimət göstərib, lakin uzun mübarizədən sonra məğlub olub.
Sonuncu, yeddinci turda Şivanandan 2034 reytinq xalına malik rəqiblə qarşılaşacaq. Partiya oktyabrın 23-də Bakı vaxtı ilə saat 16:00-da başlayacaq.
Zəruri şərtləri yerinə yetirəcəyi təqdirdə, britaniyalı şahmatçı əfsanəvi macar şahmatçısı Yudit Polqarın 38 il əvvəl müəyyənləşdirdiyi yaş rekordunu yeniləyəcək. Bununla yanaşı, o, cinsindən asılı olmayaraq, şahmat tarixində ən gənc beynəlxalq usta adını qazanan on oyunçudan birinə çevriləcək.
Şivanandan artıq bir neçə diqqətəlayiq nailiyyətin müəllifidir. Bu ilin iyulunda o, klassik şahmatda reytinqi 2600-dən yüksək olan qrossmeysteri məğlub etmiş ən gənc qadın şahmatçı olub. Həmin vaxt onun rəqibi 2628 reytinq xalına malik fransalı Mark-Andria Mauritsi idi.
2026-cı ildə Səmərqənddə keçirilən Şahmat Olimpiadasında isə o, qadınlar arasında qrossmeyster (WGM) adı üçün tələb olunan normaları ən gənc yaşda tamamlayaraq tarixə düşüb.
İndi gənc britaniyalı Monteneqroda daha bir tarixi uğura imza atmağa yaxındır.
