Idman.biz
Universiadada həmçinin qrup hərəkətləri komandamız yarışlara start verib.
İdman.biz xəbər verir ki, Ləman Əlimuradova, Darya Sorokina, Yelizaveta Luzan, Güllü Ağalarzadə və Kamilla Əliyevadan ibarət komandamız 5 lentlə çıxışda finala yüksəlib.
Beş lentlə hərəkətlər zamanı Azərbaycan yığması 24,150 bal toplayaraq, təsnifat mərhələsini birinci pillədə başa vurub.
Qrup hərəkətləri yarışında üç medal dəsti uğrunda qaliblər bəlli olacaq.
Universiadaya beş qrup komandası – Azərbaycan, Ukrayna, Cənubi Koreya, Tayvan və Yaponiya qatılacaq.
Qeyd edək ki, bədii gimnastika yarışları iyulun 17-19-da Essen şəhərində keçiriləcək.
***
20:50
Azərbaycan idmançıları Almaniyanın Reyn-Rur regionunda keçirilən Universiadada mübarizəni davam etdirirlər.
İdman.biz-in Almaniyaya ezam olunan əməkdaşı xəbər verir ki, bədii gimnastika üzrə fərdi yarışların birinci günü başa çatıb.
Kamilla Seyidzadə top və halqa hərəkətləri üzrə ümumilikdə 48.200 xal toplayıb və 25-ci yerdə qərarlaşıb. İlona Zeynalova isə 49.450 balla 20-ci yerdədir.
Sabah gimnastlar lent və gürzlə çıxış edəcəklər, bundan sonra çoxnövçülükdə qaliblər müəyyənləşəcək.
***
17:30
Azərbaycan idmançıları Almaniyanın Reyn-Rur regionunda keçirilən Universiadada mübarizəni davam etdirirlər.
İdman.biz-in Almaniyaya ezam olunan əməkdaşı xəbər verir ki, bu gün bədii gimnastika, qılıncoynatma, badminton, stolüstü tennis, tennis və üzgüçülük üzrə yarışlar keçirilir.
Bədii gimnastikanın fərdi çoxnövçülük yarışlarında İlona Zeynalova və Kamilla Seyidzadə çıxış edirlər. Zeynalova halqa və topla çıxışdan sonra ümumilikdə 49,450 xal toplayaraq hazırda ümumi sıralamada doqquzuncu yerdə qərarlaşıb.
Axşam saatlarında isə qrup hərəkətləri üzrə yarışlarda Azərbaycan komandasının da çıxışı olacaq. Komandanın heyətində Ləman Əlimuradova, Güllü Ağalarzadə, Darya Sorokina, Kamilla Əliyeva və Yelizaveta Luzan yer alıblar.
İdman.biz
