Idman.biz
Özbəkistanın Səmərqənd şəhərində keçirilən 46-cı Ümumdünya Şahmat Olimpiadasında Azərbaycan milliləri növbəti tur görüşlərinə çıxıblar.
İdman.Biz xəbər verir ki, kişilərdən ibarət yığmamız Rumıniya ilə qarşılaşmada qalibi müəyyənləşdirə bilməyib - 2:2.
Azərbaycan millisinin heyətində Rauf Məmmədov rəqibinə qalib gəlib. Şəhriyar Məmmədyarov məğlubiyyətlə üzləşib, Aydın Süleymanlı ilə Məhəmməd Muradlı isə partiyalarını heç-heçə başa vurublar.
Qadın komandamız isə növbəti qələbəsini Serbiya üzərində qazanıb - 3:1. Günay Məmmədzadə və Xanım Balacayeva komandamıza tam xal qazandırıblar. Ülviyyə Fətəliyeva və Gövhər Beydullayeva isə rəqibləri ilə xalları bölüşüblər.
Qeyd edək ki, kişi şahmatçılarımız əvvəlki turlarda Mərakeşi 4:0, Filippin və İsveçrəni 3:1 hesabı ilə üstələyib, Çexiya ilə görüşü isə 2:2 hesablı heç-heçə ilə başa vurublar. Qadın millimiz Qvatemala və Danimarka üzərində 4:0, İsveç və İngiltərə üzərində isə 2,5:1,5 hesablı qələbələr qazanıb.
11 turdan ibarət Ümumdünya Şahmat Olimpiadası sentyabrın 27-də yekunlaşacaq.
