Idman.biz
Azərbaycan Şahmat Federasiyasının (AŞF) növbəti hesabat konfransı keçirilib.
İdman.Biz xəbər verir ki, tədbir Dövlət Himninin səsləndirilməsi ilə başlayıb. Daha sonra ölkəmizin ərazi bütövlüyü uğrunda canından keçən şəhidlərin və hesabat ili ərzində vəfat edən şahmat ictimaiyyəti nümayəndələrinin xatirəsi 1 dəqiqəlik sükutla yad olunub.
Konfransda əvvəlcə AŞF prezidenti Mahir Məmmədov çıxış edərək qonaqları, iştirakçıları və mətbuat nümayəndələrini salamlayıb.
Daha sonra gənclər və idman naziri Fərid Qayıbov çıxış edərək Azərbaycan şahmatında əldə olunan nailiyyətlərdən danışıb.
Ardınca AŞF prezidenti və İcraiyyə Komitəsinin sədri Mahir Məmmədov 2025-ci ilin yekunlarına dair hesabat təqdim edib. Tədbirdə Azərbaycan şahmatında il ərzində baş verən hadisələri əks etdirən videoçarx da nümayiş olunub.
AŞF-nin müfəttişi Rauf Hacılı 2025-ci il üzrə büdcə hesabatını təqdim edib. Müzakirələrdən sonra büdcə hesabatı təsdiqlənib, həmçinin 2026-cı ilin büdcəsi ilə bağlı məlumat verilib.
Konfrans çərçivəsində federasiyanın yeni loqosu və yenilənmiş veb-saytı da iştirakçılara təqdim olunub.
11:23
Bu gün Azərbaycan Şahmat Federasiyasının (AŞF) hesabat konfransı keçirilir.
İdman.Biz xəbər verir ki, tədbirdə federasiyanın il ərzində həyata keçirdiyi fəaliyyət, ölkədaxili və beynəlxalq yarışlar, Azərbaycan şahmatçılarının nəticələri, eləcə də gələcək layihələr barədə məlumat təqdim olunur.
Hesabat dövründə Azərbaycanda müxtəlif yaş qrupları üzrə ölkə çempionatları, rapid və blits yarışları, Respublika Şahmat Olimpiadası və bir sıra beynəlxalq turnirlər təşkil edilib. Bunlar arasında "Chess Tour Azerbaijan" layihəsi çərçivəsində keçirilən "Baku Open", "Sheki Open", "Shamakhi Open", "Lankaran Open", "Guba Open", "Ganja Open" və "Shirvan Open" yarışları da yer alıb.
Tədbirdə federasiyanın yeni loqosu və yenilənmiş veb-saytının təqdimatı olacaq.
Qeyd edək ki, konfransda həmçinin federasiyanın fəaliyyəti ilə bağlı hesabatların təqdim olunması və gələcək hədəflərin müzakirəsi nəzərdə tutulub.
FOTO: İslam Atakişiyev
