Idman.biz
Avqustun 20-24-də Braziliyanın Rio-de-Janeyro şəhərində keçiriləcək bədii gimnastika üzrə dünya çempionatının proqramı açıqlanıb.
İdman.biz xəbər verir ki, ilk iki gündə – avqustun 20 və 21-də fərdi təsnifat yarışları baş tutacaq.
Bu mərhələdə çoxnövçülük üzrə 18 finalçı, eləcə də ayrı-ayrı alətlərlə çıxışlarda ən güclü 8 gimnast müəyyən olunacaq.
Avqustun 22-də - yarışın üçüncü günündə fərdi çoxnövçülükdə mükafatlandırma mərasimi ilə yadda qalacaq.
Avqustun 23-də - dördüncü gündə qrup komandaları ilk dəfə xalça üzərinə çıxacaq. Hər qrup iki kompozisiya təqdim edəcək: biri beş lentlə, digəri isə üç top və iki halqa ilə. Bu yarış yalnız iki final mərhələsi üçün təsnifat xarakteri daşımır, həm də qrup çoxnövçülüyü və komanda hesabı üzrə medalların qazanılması üçün fürsətdir.
Yarışın son günü – avqustun 24-də isə ayrı-ayrı növlər üzrə finallar keçiriləcək.
Ümumilikdə, çempionatda doqquz medal dəsti uğrunda mübarizə aparılacaq.
Azərbaycan mövsümün ən əsas yarışında fərdi proqramda bir gimnast və qrup komandası ilə təmsil olunacaq.
Fərdi yarışda Kamilla Seyidzadə, qrup komandasının heyətində isə Ləman Əlimuradova, Darya Sorokina, Yelizaveta Luzan, Güllü Ağalarzadə, Kamilla Əliyeva və Sofiya Məmmədova çıxış edəcəklər.
İdman.biz
