Idman.biz
Lixtenşteyn millisinin baş məşqçisi Konrad Fyunfştyuk UEFA Millətlər Liqasında Azərbaycana 0:1 hesablı məğlubiyyətdən sonra rəqibin oyunun sonlarında vaxt uzatdığını bildirib.
İdman.Biz Lixtenşteyn Futbol Federasiyasının rəsmi saytına istinadən xəbər verir ki, almaniyalı mütəxəssis Azərbaycan millisinin üstünlüyünü qorumaq üçün vaxtdan və əvəzetmələrdən istifadə etməsini öz komandasının göstərdiyi mübarizənin göstəricisi kimi qiymətləndirib:
"Azərbaycanı elə vəziyyətə gətirdik ki, onlar vaxt uzadır və artırılmış dəqiqələrdə strateji əvəzetmələr edirdilər. Bu, komandamızın bugünkü çıxışını göstərir".
Fyunfştyuk məğlubiyyətdən məyus olduğunu, lakin futbolçularının çıxışı ilə fəxr etdiyini vurğulayıb. Onun sözlərinə görə, komanda ilk 10 dəqiqədə çətinlik çəkib və müəyyən qədər bəxti gətirib. Daha sonra isə oyuna uyğunlaşaraq taktiki baxımdan yüksək səviyyədə çıxış edib.
Baş məşqçi müdafiə xəttində ciddi dəyişikliklərə baxmayaraq komandasının yaxşı oyun göstərdiyini qeyd edib. Bununla belə, hücumların son mərhələsində daha çox ağıllı qərarlara və qətiyyətə ehtiyac olduğunu etiraf edib.
Fyunfştyuk Azərbaycanla keçirilən iki qarşılaşmanı da dəyərləndirib. O bildirib ki, qrupun qalibi ilə oynadıqları dörd hissənin üçü heç-heçə başa çatıb, yalnız birində 1:0 hesabı ilə məğlub olublar. Mütəxəssis buraxılan qolu komandasının standart vəziyyətdə zəif müdafiə olunması ilə əlaqələndirib.
Baş məşqçi gənc futbolçuların heyətə cəlb edilməsini də müsbət qiymətləndirib və Litva ilə qarşıdakı oyunun nəticəsindən asılı olmayaraq Millətlər Liqasındakı çıxışları ilə fəxr edə biləcəklərini bildirib.
Qeyd edək ki, noyabrın 13-də Vadutsda keçirilən qarşılaşmada Azərbaycan millisi Mahir Emrelinin 26-cı dəqiqədə vurduğu qolla qalib gəlib və D divizionunun ikinci qrupunda birinci yeri təmin edib.
