Idman.biz
Azərbaycanın "Sabah" futbol klubu 2026/27 mövsümündə Çempionlar Liqasının əsas mərhələsində iştirak edən 36 komanda arasında sosial şəbəkələrdə ən az izləyicisi olan üç klubdan biri olub.
İdman.Biz-in "Winsportsonline" nəşrinin araşdırmasına istinadən məlumatına görə, Bakı təmsilçisinin "Facebook", "Instagram", "TikTok" və "X" platformalarındakı rəsmi hesablarının ümumi izləyici sayı 470 min təşkil edir. Bu göstərici ilə "Sabah" siyahıda 34-cü yerdə qərarlaşıb və yalnız iki klubu qabaqlayıb.
Azərbaycan təmsilçisindən aşağıda 210 min izləyicisi olan Avstriya LASK-ı və 190 min izləyicisi olan Norveçin "Vikinq" klubu yer alıb. Beləliklə, "Sabah" Avstriya klubunu 260 min, Norveç təmsilçisini isə 280 min izləyici qabaqlayır.
Bakı klubu ən yaxın rəqibi Slovakiyanın "Slovan"ından isə cəmi 10 min izləyici geri qalır. Siyahıda 33-cü olan bu komandanın sosial şəbəkələrdə ümumilikdə 480 min izləyicisi var. Fərq təxminən 2,1 faiz təşkil edir.
Avropanın aparıcı futbol brendləri ilə digər iştirakçılar arasındakı fərq reytinqin lideri Madrid "Real"ı ilə müqayisədə daha aydın görünür. İspaniya klubunun sosial şəbəkələrdə ümumilikdə 442,8 milyon izləyicisi var. Bu, "Sabah"ın göstəricisindən təxminən 942 dəfə çoxdur.
Reytinqdə ikinci yerdə 396,7 milyon izləyici ilə "Barselona", üçüncü pillədə isə 225,5 milyon izləyicisi olan İngiltərənin "Mançester Yunayted" klubu qərarlaşıb. Dördüncü yeri 194,4 milyon izləyici ilə Fransanın PSJ-si tutur.
2026/27 mövsümündə Çempionlar Liqasında iştirak edən klubların sosial şəbəkələr üzrə ən çox izləyicisi olan ilk 10-luğu belədir:
"Real" (İspaniya) – 442,8 milyon
"Barselona" (İspaniya) – 396,7 milyon
"Mançester Yunayted" (İngiltərə) – 225,5 milyon
PSJ (Fransa) – 194,4 milyon
"Mançester Siti" (İngiltərə) – 172,8 milyon
"Liverpul" (İngiltərə) – 162,7 milyon
"Bavariya" (Almaniya) – 156,1 milyon
"Arsenal" (İngiltərə) – 118,1 milyon
"Atletiko" (İspaniya) – 83 milyon
"İnter" (İtaliya) – 78,5 milyon
Diqqətçəkən məqamlardan biri də ilk dörd klubun ümumi izləyici sayının 1,259 milyarda çatmasıdır. Bu, Çempionlar Liqasının bütün iştirakçılarının ümumi izləyici sayının 53,1 faizini təşkil edir. Qalan 32 klubun birlikdə 1,112 milyard izləyicisi var.
Araşdırma İngiltərə və İspaniya klublarının da böyük üstünlüyə malik olduğunu göstərib. Bu iki ölkənin təmsilçilərinin payına turnir iştirakçılarının ümumi izləyici sayının təxminən 70 faizi – 1,659 milyard izləyici düşür.
Ayrı-ayrı platformalar üzrə göstəricilərə gəlincə, Çempionlar Liqası klublarının ümumi izləyici sayına görə "Facebook" 809,1 milyonla liderdir. Sonrakı yerlərdə "Instagram" (772,3 milyon), "TikTok" (515,2 milyon) və "X" (274,3 milyon) qərarlaşıb.
Araşdırma müəllifləri vurğulayırlar ki, burada söhbət unikal istifadəçilərdən deyil, klubların rəsmi hesablarının ümumi izləyici sayından gedir. Yəni eyni azarkeş bir klubu bir neçə sosial şəbəkədə izləyirsə, hər platformada ayrıca nəzərə alınır.
Beləliklə, araşdırma Avropanın ən böyük futbol klubları ilə əsasən yerli azarkeş auditoriyasına malik komandalar arasında sosial şəbəkələrdə əhatə dairəsi baxımından ciddi fərq olduğunu göstərir.
Qeyd edək ki, Çempionlar Liqasının əsas mərhələsində dörd turdan sonra "Sabah" 3 xalla 36 komanda arasında 31-ci yerdədir. Bakı klubu bir qələbə qazanıb, üç dəfə məğlub olub.
Azərbaycan təmsilçisi beşinci turda noyabrın 25-də İspaniyanın "Barselona" klubunu qəbul edəcək. Bakı Olimpiya Stadionunda keçiriləcək qarşılaşma saat 21:45-də başlayacaq.
