Idman.biz
Azərbaycanlı muay-tay döyüşçüsü Anar Məmmədov Banqkokda keçirilən "ONE Friday Fights 178" turnirində qazandığı parlaq qələbəyə görə böyük məbləğdə pul mükafatı alıb.
İdman.Biz-in Tailandın "Daily News" nəşrinə istinadən məlumatına görə, idmançıya nokauta görə xüsusi bonus kimi 350 min bat (təxminən 10,3 min ABŞ dolları və ya 17,6 min manat) ödənilib.
"ONE Friday Fights" seriyasının iştirakçıları üçün nəzərdə tutulan təxmini döyüş qonorarlarını da nəzərə alsaq, azərbaycanlı idmançının ümumi qazancı 450-500 min bata (13,3-14,8 min ABŞ dolları və ya 22,7-25,2 min manat) çata bilər. Bununla belə, onun müqavilə üzrə qonorarının dəqiq məbləği açıqlanmadığından, bu rəqəmlər təsdiqlənməyib.
Qeyd edək ki, Anar Məmmədov "ONE Friday Fights 178" turnirində favorit hesab olunan "Superlek Cittmuangnonu" sensasiyalı şəkildə məğlub edib. Azərbaycanlı döyüşçü ilə qarşılaşmadan əvvəl 23 yaşlı tailandlı idmançı "ONE Championship" yarışlarında məğlubiyyət üzü görməmişdi.
Məmmədov rəqibini iki dəfə nokdauna saldıqdan sonra ilk raundun ikinci dəqiqə səkkizinci saniyəsində nokautla qələbə qazanıb.
