Report.az
Azərbaycanın iki şahmatçısı Dünya Kubokuna vəsiqə qazanıb.
Bu barədə "Report"a Azərbaycan Şahmat Federasiyasının mətbuat xidmətindən məlumat verilib.
Rumıniyanın Eforie Nord şəhərində gerçəkləşən Avropa çempionatında təmsilçilərimizdən ən yaxşı nəticəni Nicat Abasov əldə edib.
Son turda heç-heçə oynayan qrossmeyster 8 xalla 8-ci yeri tutub. XI turu qələbə ilə başa vuran Read Səmədov da ilk "20-liy"ə daxil olub.
Reqlamentə əsasən, Avropa çempionatında turnir cədvəlinin ilk 20 pilləsində yer alan şahmatçılar Dünya Kubokunda iştirak imkanı qazanıblar.
Yekun sıralamada 12-ci yeri tutan Read Səmədov bu il baş tutacaq Dünya Kubokunda mübarizə aparacaq. Eyni zamanda, ilk "20-lik"də olan şahmatçılardan bəziləri əvvəlki yarışlarda Dünya Kubokuna vəsiqə əldə etdiyinə görə 23-cü yerdə qərarlaşan Əhməd Əhmədzadə də mötəbər yarışda iştirakını rəsmiləşdirib.
Qitə çempionatında Read Səmədov ikinci qrossmeyster (GM), Şahin Vəliyev isə ilk beynəlxalq usta (IM) balını toplayıb. Ümid Aslanov 2300 əmsalı keçərək FIDE ustası (FM) adını əldə edib.
Qeyd edək ki, çempionatı 8-ci yerdə başa vuran Nicat Abasov Dünya Kubokuna vəsiqəni əvvəlki yarışlarda qazanıb. Azərbaycan təmsilçilərindən Rauf Məmmədov da buna nail olub.
