Idman.biz
"Sumqayıt" basketbol klubunun oyunçusu Cey Cey Kalakon klubun mətbuat xidmətinə açıqlama verib. O, Azərbaycana gəlişi, karyerası və yerli çempionatın səviyyəsi ilə bağlı fikirlərini bölüşüb.
İdman.Biz xəbər verir ki, C.Kalakon peşəkar karyerasına Finlandiyada başladığını bildirib.
Onun sözlərinə görə, ilk mövsüm çətin keçsə də, komanda dəyişikliyindən sonra əsas heyət üzvlərindən birinə çevrilib. Azərbaycan klubu ilə müqavilə isə mövsümün gedişində, dekabr ayında baş tutub. Basketbolçu əvvəlcə az oyun vaxtı alsa da, şans qazanacağına inanıb və hazırda baş məşqçinin ona güvəndiyini vurğulayıb. Xüsusilə NTD ilə kubok matçında yaxşı təsir bağışladığını qeyd edib.
C.Kalakon Azərbaycanla bağlı təəssüratlarından da danışıb. O, Bakının memarlığını yüksək qiymətləndirib, Sumqayıtın isə mentalitet və həyat tərzinə görə doğma olduğu Cənubi Sudan və Misir bölgələrinə bənzədiyini deyib. Bu oxşarlığın ona burada özünü rahat hiss etməsinə kömək etdiyini bildirib.
Basketbolçu Azərbaycan Basketbol Liqasının səviyyəsini də dəyərləndirib. Onun sözlərinə görə, yerli çempionat ABŞ-da çıxış etdiyi kollec liqasından geri qalmır və bu, onun üçün çox müsbət məqamdır. C.Kalakon əlavə edib ki, "Sumqayıt"ın heyətində hər bir oyunçu oyunun taleyini həll edə biləcək potensiala malikdir.
Qeyd edək ki, Cey Cey Kalakon Azərbaycan Basketbol Liqasının səviyyəsinin Finlandiya çempionatından daha yüksək olduğunu da vurğulayıb. Onun fikrincə, ölkəmizdə komandalar daha çox forvard və mərkəz oyunçuları üzərində oyun qurur, Finlandiyada isə oyun qurucuları və müdafiəçilər ön planda olur.
