Idman.biz
Azərbaycanın 3x3 basketbol üzrə qadın milli komandası ardıcıl üçüncü dəfə İslam Həmrəyliyi Oyunlarında qızıl medal qazanıb. Lakin heyətdə belə uğuru ilk dəfə yaşayan bir basketbolçu var. Söhbət İdman.Biz-in suallarına cavab verən Brianna Freyzerdən gedir.
- Azərbaycan millisi İslamiadada üçüncü dəfə qələbə qazandı, amma bu cür turnirdə sizin üçün ilk qızıl medaldır. Bu nailiyyəti necə qiymətləndirirsiniz?
- Mənim üçün bu qızıl həqiqətən çox özəldir. Təkcə sevinci yox, həm də böyük məsuliyyət hiss edirəm – artıq belə zəfər tarixçəsi olan bir komandanın bir hissəsi olmaq sözün əsl mənasında qürurvericidir. Bu, sadəcə medal deyil, doğru istiqamətdə irəlilədiyimizi təsdiqləyən bir göstəricidir. Bu uğura öz töhfəmi verə bildiyim üçün qürur duyuram.
- Turnirin gedişinə baxanda, finalda Türkiyə ilə qarşılaşma gözlənilən idi?
- Belə də demək olar. Türkiyə regionun ən stabil və güclü komandalarından biridir və turnir boyu hiss olunurdu ki, gec-tez qarşılaşacağıq. Rəqibin oyun üslubunu bilirdik və qarşılaşmanın gərgin keçəcəyini anlayırdıq. Elə də oldu.
- Ər-Riyadda yarış atmosferi necə idi?
- Atmosfer inanılmaz idi. Azarkeşlər əsl idman bayramı ab-havası yaradırdılar. Gərgin oyunlarda belə tribunalardakı enerji diqqəti qorumağa və güc toplamağa kömək edirdi. Xüsusən də komandanı fərdi şəkildə dəstəkləyənlər çox olanda. Buna görə bizimlə yaşayan, bizi dəstəkləyən hər kəsə təşəkkür edirəm.
- Milli komanda bu mövsüm də beynəlxalq arenada özünü göstərdi: Avropa çempionatında "gümüş", Dünya Liqasının finalında ikinci yer. Bu ili inqilabi mövsüm saymaq olar?
- Razıyam. Əgər ötən mövsüm komanda yeni səviyyəyə yüksəlibsə, bu mövsüm həmin səviyyəni qorumağı bacardığını göstərdi. Daha stabil olmuşuq, oyunların həlledici məqamlarına daha inamla nəzarət edirik. Amma yaxşı bilirik ki, üzərində işləməli olduğumuz məqamlar hələ çoxdur, xüsusən də daim liderlər sırasında olmaq istəyiriksə.
- Hazırkı heyəti tam uyğunlaşmış hesab etmək olar, yoxsa inkişafın həddi yoxdur?
- İnkişafın həddi yoxdur - bu, tam olaraq bizə aiddir. Meydanda bir-birimizi yaxşı anlayırıq, hər kəsin güclü tərəflərini bilirik. Amma 3x3 formatında daim inkişaf vacibdir: qərarların sürəti, qarşılıqlı kömək, müxtəlif taktiki variantlar. Biz kollektiv kimi hələ də böyüməkdəyik və bu, məni sevindirir.
- Son sual uzunmüddətli planlarla bağlıdır. Yəqin ki, əsas hədəf Los-Anceles Olimpiadasıdır. Bu istiqamətdə ilkin plan varmı?
- Olimpiada, əlbəttə, əsas hədəfdir. Amma biz ona uzun yolun son nöqtəsi kimi baxırıq. Hazırkı əsas plan - heyəti gücləndirmək, daha çox beynəlxalq turnirdə iştirak etmək, statistikanı yaxşılaşdırmaq və reytinq xalları toplamaqdır. Los-Ancelesə sadəcə iştirak üçün yox, yüksək yerlər uğrunda mübarizə aparmaq üçün yollanmaq istəyirik. İş artıq başlayıb.
Zəki Feyzullayev
