Idman.biz
Türkiyədə Bosfor boğazında tapılan naməlum kişi cəsədinin kimliyinə aydınlıq gətirilməsi istiqamətində yeni detallar üzə çıxıb. Beş ay əvvəl boğazda keçirilən qitələrarası üzgüçülük yarışı zamanı itkin düşən Nikolay Svyeçnikovla bağlı ehtimallar güclənib.
İdman.Biz xəbər verir ki, üzgüçünün yaxın qohumu Alena Karaman Türkiyənin Arnavutköy rayonundakı polis idarəsində ifadə verib və Nikolayın yarış günü üzərində olan geyimlə bağlı fotoları təqdim edib. Onun sözlərinə görə, tapılan cəsədin üzərindəki hidrokostyum Svyeçnikovun geyindiyi kostyumla demək olar ki, eynidir.
Karaman bildirib ki, tapılan cəsədin Nikolaya məxsus olduğuna 99 faiz əmindir. Onun sözlərinə görə, hidrokostyumun qara rəngi, çəhrayı haşiyəsi və bədən quruluşu tam uyğun gəlir. Bununla belə, o, DNT testinin nəticələri olmadan yüz faiz əmin ola bilmədiyini vurğulayıb.
Məlumata görə, naməlum kişinin cəsədi Bosfor boğazının Kuruçeşmə sahillərində, qitələrarası üzgüçülük marafonunun finiş nöqtəsinə yaxın ərazidə aşkarlanıb. Yerli hakimiyyət orqanları ilk andan cəsədin məhz Nikolay Svyeçnikova aid ola biləcəyini ehtimal ediblər və bu səbəbdən yaxınlarını tanınma üçün dəvət ediblər.
Qeyd olunur ki, Alena Karaman birinci dərəcəli qohum olmadığı üçün birbaşa tanınma prosesinə buraxılmayıb. Ona yalnız fotolar təqdim edilib və həmin görüntülər əsasında o, üzgüçülük kostyumunu tanıyıb. Hadisə ilə bağlı DNT ekspertizasının aparılacağı da təsdiqlənib.
