Idman.biz
III MDB Oyunlarında üzgüçülük yarışları Azərbaycan üçün sürpriz nəticələrlə yadda qalıb.
Üzgüçülərimiz ümumilikdə 13 medal qazanıblar. Onlardan ikisi qızıl, dördü gümüş, yeddisi isə bürünc medal olub.
Azərbaycan millisinin məşqçisi və eyni zamanda çempionlardan biri - Süleyman İsmayılzadənin şəxsi məşqçisi Ruslan Hətəmxanov İdman.biz-ə müsahibəsində üzgüçülük üzrə Azərbaycan milli komandasının son uğurlarından danışıb.
– Komandamızdan bu qədər medal gözləyirdinizmi?
– Məşqçi heyətimiz bilirdi ki, idmançılarımızdan kimsə qızıl medal qazanacaq. Amma bu qədər medalın olacağını gözləmirdik. Bu, bizim üçün xoş sürpriz oldu. Ən əsası, üzgüçülükdə qızıl medal qazanan üç ölkədən biri olmağımız bizi çox sevindirdi. Turnirdə bizdən başqa yalnız Rusiya (36 qızıl) və Belarus (4 qızıl) üzgüçüləri çempion ola bildilər, biz də öz növbəmizdə qızıl medal qazanan ölkələrin sırasına qoşulduq.
Bilirsiniz, Azərbaycanda bəzən üzgüçülüyə bir qədər skeptik yanaşılır. Amma biz - gənclərlə çalışan məşqçilər yaxşı bilirdik ki, komandamız kifayət qədər rəqabətqabiliyyətlidir. Məsələn, Süleyman İsmayılzadə hələ 16 yaşı tamam olmadan gənclər arasında Avropa çempionatının (U-18) finalçısı olmuşdu. İndi isə 16 yaşında 400 metr sərbəst üzmə məsafəsində qızıl medal qazandı.
– Ancaq o, daha çox qızıl medal da qazana bilərdi...
– Tamamilə doğrudur! Süleyman 800 metr məsafədə cüzi fərqlə birinci yeri əldən verdi. Biz bunu gümüş qazanmaqdan çox "qızılı əldən vermək" kimi dəyərləndiririk. Bundan başqa, o, 200 və 1500 metr məsafələrdə daha iki gümüş, 4x200 metr sərbəst estafetdə isə bürünc medal qazandı.
– Yeni Vladimir Salnikov Vladimir Salnikov yetişir (müxtəlif məsafələrdə sərbəst üzgüçülük üzrə dördqat olimpiya çempionu – red). yetişir desək, yanılmarıq?
– Təbii ki, hələ Salnikov səviyyəsinə çatmaq üçün vaxt lazımdır. Amma uzun illərdən sonra böyüklər arasında rəqabət apara biləcək səviyyədə üzgüçünün yetişməsi faktdır. Bu, bizim üzgüçülüyümüz üçün çox vacibdir.
- Bəs onu saxlaya biləcəyinizə əminsinizmi? Axı çox vaxt 18 yaşdan sonra perspektivli idmançılarımızı itiririk...
– Əsas təminat onun da, bizim də yeni uğurlara fokuslanmağımızdır. İsmayılzadə tək deyil - oyunların digər çempionu Oktay Hüseynov da var. Bu gənclər Azərbaycan üzgüçülüyünün yaxın gələcəyidir və biz onlara böyük ümid bəsləyirik.
Vüqar Vüqarlı
