Idman.biz
III MDB Oyunlarında keçirilən taekvondo yarışlarının sədrliyini icra edən Azərbaycan Taekvondo Federasiyasının vitse-prezidenti Niyaməddin Paşayev yarış və təşkilatçılıqla bağlı təəssüratlarını bölüşüb.
Dünya çempionu sportnet.az-a açıqlamasında yarış yüksək səviyyədə təşkil olunduğunu bildirib.
Onun sözlərinə görə, təşkilatçılıq beynəlxalq standartlar səviyyəsində olub: "Yarış çox yüksək səviyyədə təşkil olunmuşdu. Mingəçevirə 15 gün qalmış gəldiyimizdə işlərin əksəriyyətinin görüldüyünü gördük. Son 3 gün qalmış isə artıq tam hazır arena ilə qarşılaşdıq. Hesab edirəm ki, yarış beynəlxalq standartlara uyğun şəkildə təşkil olundu. İstər qonaqlar, istərsə də həm xarici, həm də yerli idmançılar öz güclərini sınaqdan keçirə bildilər".
Paşayev Azərbaycanın bəzi idmançılarının yarımfinalda uduzmalarına da toxunub: "Biz yalnız bu günə baxmamalıyıq. Ümumilikdə bir komandayıq. Finala çıxmağa yaxın potensiallı idmançılarımız var idi. Onlardan biri qadınlar arasında ən təcrübəlilərdən sayılan Avropa çempionu Zenfira Həsənova idi. Amma bəxtsizlik oldu, şanssızlıq ucbatından heç biri finala çıxa bilmədi. Halbuki, təlim-məşqlərdə və turnirlərdə göstərdikləri nəticələr onların finala çıxacağını göstərirdi. Təəssüf ki, alınmadı. Amma günün sonunda Vasif çox gözəl döyüş nümayiş etdirdi və yarışı qızıl medalla başa vurdu."
Keçmiş idmançı kimi yarışların səviyyəsini dəyərləndirən vitse-prezident qeyd edib ki, bütün görüşlər gərgin mübarizə şəraitində keçib: "Həm bizim idmançılar, həm də xaricdən gələnlər çox gərgin döyüşlər göstərdilər. Asan qələbə olmadı. Bu da idmanın özüdür – mübarizədir, güclü olan qalib gəlir".
