Idman.biz
III MDB Oyunları artıq yarı mərhələni geridə qoyub. Azərbaycan yığması isə medal sıralamasında ikinci yerdə qərarlaşıb və uğurlu çıxışını davam etdirir.
İdman.biz xəbər verir ki, yarışlar ölkənin yeddi şəhərində keçirilir. 3 oktyabr tarixinə olan nəticələrə əsasən, Azərbaycan yalnız Rusiya komandasına geri qalaraq ikinci pillədədir.
Turnirin birinci yarısında ən böyük hadisə üzgüçülükdə baş verib. Azərbaycan tarixdə ilk dəfə MDB Oyunlarında üzgüçülük üzrə qızıl medal qazanıb. 400 metr sərbəst üzmə yarışında Süleyman İsmayılzadə birinci yeri tutaraq tarixi uğura imza atıb. Bu, üzgüçülüyün ölkəmizə medal qazandıran əsas idman növlərindən birinə çevrildiyini göstərir.
Taekvondoçular (Mingəçevirdə keçirilən yarışda) və samboçular (Göygöldə keçirilən) da komandanın uğurlarına ciddi töhfə veriblər. Azərbaycanın bu yarışlardakı ilk qızıl medalı da məhz Gəncədən gəlib - 53 kiloqram çəki dərəcəsində finalda qalib gələn Abdullətif Musayev bu nailiyyətə imza atıb.
Gimnastika yarışları da bizə sevinc yaşadıb. Şəkidə batut gimnastikası üzrə yarışda idmançılarımız finala yüksəlməklə yanaşı, kişilərin fərdi proqramında qızıl medal qazanıblar. İdmançılarımızın çıxışları həm texniki, həm də emosional baxımdan yüksək qiymətləndirilib. Bundan əlavə, cümə günü Azərbaycan ilk dəfə qılıncoynatmada da medal əldə edib.
İdmançılar bir çox növdə zirvəyə çox yaxın olublar. Üzgüçülükdə gümüş və bürünc medallar, atıcılıqda və batut gimnastikasında isə komanda gümüşü qazanılıb. Bu nəticələr yığmamızın potensialının böyük olduğunu göstərir.
Qeyd edək ki, bu MDB Oyunları Azərbaycan tarixində ilk dəfə tam şəkildə regionlarda keçirilən çoxnövlü idman tədbiridir. Yarışlar 7 şəhərdə, 12 arenada təşkil olunub və 23 idman növü üzrə qaliblər müəyyənləşir. Bu addım regionlarda idman infrastrukturunun inkişafına və gələcək yarışların təşkilinə təkan verir.
Yeni və yenilənmiş idman obyektləri beynəlxalq yarışlara ev sahibliyi edir, yerli təşkilatçılar və hakimlər dünya səviyyəsində təcrübə qazanır, könüllülər və xidmət komandalarının peşəkarlığı artır, bölgələrə turist marağı yüksəlir. Yarışların təşkili yüksək səviyyədədir və qonaqlar Oyunların ab-havasından razıdırlar.
Xüsusi diqqət Xankəndinə ayrılıb. Burada oxatma yarışları keçirilir. Xankəndinin yarışlar xəritəsinə daxil edilməsi ölkənin idman coğrafiyasının genişlənməsi və logistikanın güclənməsi baxımından önəmli addımdır. Bu, həm böyük məsuliyyət, həm də simvolik məna daşıyır. Eyni zamanda bölgənin infrastruktur və kadr potensialının inkişafına ciddi təkan verir.
Yarışların finiş mərhələsi yaxınlaşır. Bağlanış mərasimi 8 oktyabrda keçiriləcək. Azərbaycan yığması ikinci hissəyə həm sabitlik, həm də qələbə əzmi ilə daxil olur. Məqsəd aydındır - tempin qorunması, qızıl medallara yaxın imkanların reallaşdırılması və ev oyunlarının yüksək səviyyədə tamamlanması.
Teymur Tuşiyev
