Sport24.az
Bu gün III MDB Oyunlarında 11 idman növü üzrə yarışlar keçiriləcək. Sport24.az xəbər verir ki, Qəbələ şəhər stadionunda futbol üzrə final matçı baş tutacaq.
Həlledici qarşılaşmada Azərbaycanın U-16 millisi Rusiyadan olan həmyaşıdları ilə qarşılaşacaq.
Qəbələdə badmintonçuların yarışı da baş tutacaq.
Gəncə İdman Sarayında 17 yaşadək oğlan voleybolçulardan ibarət Belarus millisi Özbəkistanla, Azərbaycan isə Rusiya ilə qarşılaşacaq.
Eyni məkanda qılıncoynatma üzrə yarışda növbəti medalçılar müəyyənləşəcək. Gəncə İdman Sarayında güllə atıcılığı yarışı da başlayacaq.
Gəncə Olimpiya Kompleksində isə qadın pəhləvanlar və sərbəst güləşçilər arasında qaliblər bəlli olacaq.
Şəkidə çövkən üzrə yarımfinal matçları keçiriləcək.
Yevlax Olimpiya İdman Kompleksində boks üzrə qızıl medal uğrunda görüşlər reallaşacaq.
Xankəndidə isə kamandan oxatma yarışı davam edəcək.
Mingəçevirdə karate yarışında son günün qaliblərinin adları müəyyənləşəcək.
Göygöldə isə cüdoçular tatami üzərinə çıxacaq.
Qeyd edək ki, III MDB Oyunları oktyabrın 8-də başa çatacaq. Yarışa 13 ölkədən 1 624 idmançı və 2 337 nümayəndə qatılıb. Turnirdə Azərbaycanı 340, Pakistanı 4, Rusiyanı 262, Özbəkistanı 254, Belarusu 240, Qazaxıstanı 147, Tacikistanı 144, Qırğızıstanı 126, Türkmənistanı 48, Türkiyəni 38, Kubanı 11, Küveyti 6, Omanı isə 4 idmançı təmsil edir.
