Idman.biz
"Bakı 2026-cı il üzrə Dünya İdman Paytaxtı roluna hazırlaşır, iri beynəlxalq tədbirlərə ev sahibliyi edir, idman infrastrukturu genişləndirilir və elit idman, gənclər proqramları və sosial inklüzivlik təşəbbüslər üzrə iştirak artırılır".
İdman.Biz xəbər verir ki, bu sözləri gənclər və idman naziri Fərid Qayıbov "Euronews" kanalına müsahibəsində deyib.
Nazir bildirib ki, Bakı 2026-cı ildə Dünya İdman Paytaxtı statusuna hazırlıq çərçivəsində qlobal idman səhnəsində mövqeyini gücləndirir.
"Son illərdə həm paytaxtda, həm də regionlarda 200-dən çox idman obyektimiz inşa olunub. Biz paytaxtda çoxsaylı və çoxnövlü idman tədbirləri ilə yanaşı, müxtəlif beynəlxalq tədbirlər də təşkil etmişik. Beləliklə, artıq müəyyən irsimiz var", - deyə F.Qayıbov vurğulayıb.
May ayında idman sahəsində çox yaxşı tanınan "SportAccord" tədbirinin Azərbaycanda təşkil ediləcəyini söyləyən nazir ən böyük idman biznes forumu, eləcə də WADA-nın Avropa simpoziumlarının mart ayında Bakıda keçiriləcəyini, eyni zaman ölkəmizin "Formula-1" yarışına və digər böyük idman tədbirlərinə ev sahibliyi edəcəyini deyib:
"Cüdo üzrə Dünya Çempionatı və voleybol üzrə Avropa Çempionatı keçiriləcək. Sumo üzrə Dünya Çempionatına ev sahibliyi edəcəyik və bəzi qış idman növlərində ilk dəfə olaraq Avropa Çempionatını və Dünya Kubokunun final mərhələsini təşkil etmişik".
Qadınların idmanda iştirakına da toxunan nazir son oyunlarla müqayisədə onların sayının artığını bildirib:
"Bu, çox yaxşı göstəricidir - təxminən 40 faiz təşkil edir. Bizim üçün son çoxnövlü idman tədbiri bu yaxınlarda Səudiyyə Ərəbistanında keçirilmiş İslam Həmrəyliyi Oyunları olub. Görürük ki, qadın idmançılarımızın bir çoxu medal qazanıb. Bundan əlavə, idman sahələrində qadın idman menecerlərinin, eləcə də məşqçilərin və hakimlərin sayı da getdikcə artır".
F.Qayıbov idmanda əsas istiqamətlərdən birinin sosial inklüzivlik olduğunu vurğulayıb: "Dəstəklədiyimiz Xüsusi Olimpiya Oyunları və Deaflimpiya Oyunları da var. Bu yaxınlarda Azərbaycan Deaflimpiya Oyunlarında ilk medalını qazanıb".
Azərbaycanın bir çox beynəlxalq təşkilatlarla əməkdaşlıq etdiyini söyləyən idman naziri ölkəmizdə çoxsaylı gənclər forumlarının təşkil olunduğunu bildirib:
"Müxtəlif şəhərlər müxtəlif təşkilatların gənclər paytaxtı olub. Lənkəran türk dövlətləri ölkələrinin gənclər paytaxtı olub. Şuşa isə İƏT təşkilatının gənclər paytaxtı elan edilib, biz bunu ISESCO ilə birlikdə təşkil etmişik. Bu, gənclərimiz üçün çox yaxşı təcrübədir, çünki hər il keçirilən tədbirlərimizdə getdikcə daha çox könüllünün müraciət etdiyini görürük.
Bir çox beynəlxalq təşkilat bizə etibarlı və səmərəli tərəfdaş kimi baxır. Məhz bu səbəbdən düşünürəm ki, Bakı Dünya İdman Paytaxtı elan olunub".
