Idman.biz
Azərbaycanda keçirilən III MDB Oyunları davam edir. İdman yarışları ilə yanaşı, müxtəlif ölkələrdən ölkəmizə gələn jurnalistlər üçün müxtəlif tədbirlər təşkil olunur.
İdman.biz xəbər verir ki, Belarusun "Birinci informasiya" telekanalının əməkdaşları mediatur çərçivəsində Azərbaycanın işğaldan azad edilən torpaqlarında olublar.
Bu barədə ölkənin yerli telekanalında danışılıb. Süjetdə qeyd olunur ki, xarici ölkələrdən olan jurnalistlər ilk Şuşanı ziyarət ediblər.
Mediaturun növbəti dayanacağı Xankəndi və buradakı "Xankəndi stadionu" olub. Məhz burada MDB Oyunları çərçivəsində oxatma yarışları keçirilir. Yarışlarda Belarus idmançıları da iştirak edirlər.
Belarusun atıcılıq növləri üzrə milli mərkəzinin məşqçi-müəllimi Sergey Pupkeviç təşkilatçılığı yüksək qiymətləndirib:
"Azərbaycanın iqlimini nəzərə alsaq, hava bir qədər arzuolunan deyil, amma ümumilikdə hər şey çox yaxşıdır. Təşkilatçılıq 2015-ci ildə Bakıda keçirilən Avropa oyunlarından heç də geri qalmır. Hər şey yüksək səviyyədədir".
Azərbaycanın gənclər və idman naziri Fərid Qayıbov da mediatur zamanı jurnalistlərin suallarını cavablandırıb:
"Təşkilatla bağlı müxtəlif nümayəndə heyətlərindən olan idmançılarla danışmaq imkanım oldu. Daha əvvəl müşavirə keçirilmişdi, orada Belarus idman nazirinin müavini və belaruslu nümayəndə heyəti də iştirak edirdi. İndiyədək bizə heç bir irad bildirilməyib. Ümid edirəm ki, oyunların sonunadək hər şey uğurla davam edəcək".
Azərbaycanlı nazir həmçinin Belarusun idman sahəsindəki təcrübəsinə də toxunub və qeyd edib ki, dəfələrlə bu ölkədə olub, lakin II MDB Oyunlarında iştirak edə bilməyib. Bununla belə, yarışların yüksək səviyyədə təşkil olunduğunu bildiyini vurğulayıb:
"Mən Belarusda keçirilən Avropa oyunlarında olmuşam. Yarışlar çox yüksək səviyyədə təşkil edilmişdi. Belarus xalqına və idmançılara uğurlar arzulayıram".
Mediatur Belarus jurnalistlərinə Azərbaycanın Qarabağ bölgəsini, MDB Oyunlarının təşkilatçılığını və yarışların gedişatını yaxından tanımaq imkanı yaradıb.
