Idman.biz
2026-cı il Qış Olimpiya Oyunları ərəfəsində ABŞ-nin təhlükəsizliklə bağlı qərarı İtaliyada narahatlıq yaradıb. Söhbət ABŞ-nin İmmiqrasiya və Gömrük Mühafizəsi Xidmətinə (ICE) bağlı bir bölmənin Oyunlar zamanı İtaliyada fəaliyyət göstərəcəyinə dair məlumatdan gedir.
İdman.Biz "APnews"a istinadla xəbər verir ki, sözügedən bölmə ICE-nin tərkibində olan və transmilli cinayətlərlə məşğul olan "Homeland Security Investigations" (HSI) strukturudur. HSI əməkdaşları Olimpiya kimi iri beynəlxalq tədbirlərdə təhlükəsizlik planlaşdırılmasına dəstək məqsədilə xaricə göndərilir. Qeyd olunur ki, onlar ABŞ-də miqrasiya nəzarəti və deportasiya ilə məşğul olan "Enforcement and Removal Operations" (ERO) bölməsinə aid deyil və ERO əməkdaşlarının İtaliyaya göndərilməsi planlaşdırılmayıb.
Lakin bu fərqin ilkin mərhələdə aydın təqdim olunmaması İtaliyada kəskin reaksiyalara səbəb olub. Xüsusilə ABŞ prezidenti Donald Tramp administrasiyasının sərt miqrasiya siyasəti fonunda ICE adının hallanması ictimai narazılığı gücləndirib.
Milan şəhərinin meri Cüzeppe Sala ICE əməkdaşlarının şəhərdə arzuolunmaz olduğunu bildirərək, bu qurumu açıq şəkildə tənqid edib. O, fevralın 6-da keçiriləcək açılış mərasiminə ABŞ vitse-prezidenti Cey Di Vensinin də qatılacağını xatırladıb.
İtaliyanın Daxili İşlər Nazirliyi isə açıqlamasında HSI əməkdaşlarının Milandakı ABŞ konsulluğunda yerləşən nəzarət mərkəzində, yalnız dəstəkçi rolda fəaliyyət göstərəcəyini vurğulayıb. Nazirlik qeyd edib ki, ölkə ərazisində bütün təhlükəsizlik əməliyyatları tam şəkildə İtaliya hakimiyyətinin səlahiyyətində qalacaq.
Beynəlxalq Olimpiya Komitəsi də təhlükəsizliyin ev sahibi ölkənin məsuliyyəti olduğunu açıqlayıb. Qış Olimpiadası üçün İtaliya ərazisində altı mindən çox polis və təhlükəsizlik əməkdaşının cəlb olunacağı bildirilir. Oyunlar Milan şəhərindən Avstriya sərhədinə qədər geniş bir ərazini əhatə edəcək.
