Ağasəlim Mircavadov “Zirə”nin avrokubok oyununa dair fikirlərini bölüşüb

"Zirə"nin yay toplanışındakı oyunlarını izləməmişəm. Buna baxmayaraq, qəsəbə təmsilçisinin uğurlu nəticə qazanacağına inam böyükdür. Rəqib "Torpedo" Gürcüstanın köklü və ənənələri olan klublarından biridir". Bu sözləri Sport24.az-a Ağasəlim Mircavadov deyib.

Təcrübəli mütəxəssis "Zirə"nin Konfrans Liqasının I təsnifat mərhələsində Gürcüstan təmsilçisi "Torpedo" ilə oyunundan gözləntilərini bölüşüb:

"Bu komanda son illərdə mütəmadi olaraq avrokuboklarda çıxış edir və demək olar ki, hər mövsüm ən azı bir-iki mərhələ keçməyi bacarır. Belə təcrübəyə malik rəqiblə qarşılaşmaq heç vaxt asan olmur. Üstəlik, "Torpedo" bu mövsüm də iddialı görünür və ölkə Superkubokunun son qalibi kimi matça yüksək əhval-ruhiyyədə çıxacaq. Bu amil futbolçuların özünəinamına müsbət təsir göstərir. İlk oyunun vətəndə keçirilməsi "Zirə" üçün ciddi üstünlükdür. Evdə azarkeş dəstəyi və tanış şərait komandanın daha rahat futbol sərgiləməsinə kömək edə bilər. Fikrimcə, "Zirə" ilk qarşılaşmada üstünlüyü ələ almağa çalışmalıdır. Təbii ki, hər matçda bolqollu qələbə qazanmaq mümkün olmur. Amma cavab oyunu öncəsi rahat üstünlük əldə etmək komandanın işini xeyli asanlaşdırar. Əks halda, Gürcüstanda keçiriləcək cavab görüşündə həm rəqib azarkeşlərinin təzyiqi, həm də meydan amili əlavə çətinlik yaradacaq. Azərbaycanda fasilə olduğu halda, Gürcüstanda çempionatı davam edir. Bu da rəqibin oyun təcrübəsi baxımından üstün vəziyyətdə olduğunu göstərir. "Zirə"nin futbolçuları isə müəyyən mənada oyun ritmindən uzaq qalıblar. Belə qarşılaşmalarda nəticəni çox vaxt xarakter, əzmkarlıq və düzgün oyun planı müəyyənləşdirir".

Qeyd edək ki, qarşılaşma bu gün Mehdi Hüseynzadə adına Sumqayıt şəhər stadionunda, saat 20:00-da start götürəcək.