Idman.biz
"Real Madrid"in baş məşqçisi Joze Mourinyo UEFA Çempionlar Liqasının əsas mərhələsinin üçüncü turunda "RB Leypsiq" üzərində 4:1 hesablı qələbəni şərh edib və La Liqada "Barselona" ilə keçiriləcək qarşıdakı oyundan danışıb.
İdman.Biz xəbər verir ki, portuqaliyalı mütəxəssis komandasının çıxışından razı qaldığını, lakin buraxılan qoldan narazı olduğunu söyləyib.
"Mən razıyam, çünki Bernardonun belə bir oyuna çox ehtiyacı var idi. Bu günə qədər o, "Real Madrid"də demək olar ki, nəzərə çarpmırdı.
Bəyənmədiyim yeganə məqam buraxdığımız qol oldu. Kurtua buna layiq deyildi.
Komanda yaxşı oyun keçirdi, sağ cinahdakı fəaliyyətimiz son dərəcə effektiv idi. Hazırda doqquz xalımız var və pley-offa çox yaxınıq.
Amma "El-Klasiko" öncəsi artıq "Barselona" ilə müqayisədə istirahət üçün 24 saat az vaxtımız var", - deyə Mourinyo bildirib.
Portuqaliyalı mütəxəssis "El-Klasiko" öncəsi özünü nə dərəcədə inamlı hiss etməsi ilə bağlı sualı da cavablandırıb:
"Söhbət "El-Klasiko"dan gedəndə "inam" sözü o qədər də uyğun deyil. Bu, çempionatın növbəti oyunudur, amma eyni zamanda digər matçlardan tamamilə fərqlənir. Görək, hadisələr necə inkişaf edəcək. "Barselona" ilə müqayisədə bərpa üçün 24 saat az vaxtımız var. Amma bunun öhdəsindən gələcəyik".
Xatırladaq ki, "Barselona" və "Real Madrid" arasında qarşılaşma oktyabrın 25-də Kataloniya klubunun meydanında keçiriləcək.
Doqquz turdan sonra "Barselona" mümkün 27 xalın hamısını toplayaraq La Liqanın turnir cədvəlinə başçılıq edir. Madrid təmsilçisi isə prinsipial rəqibindən altı xal geri qalır.
