Idman.biz
FIFA prezidenti Canni İnfantino Bakıda keçiriləcək 15 yaşadək futbolçular arasında ilk dünya çempionatı və FIFA festivalına hazırlığın başa çatdığını açıqlayıb. Ali futbol qurumunun rəhbəri tarixi yarışın bütün dünyaya mühüm mesaj olduğunu vurğulayıb.
İdman.Biz xəbər verir ki, İnfantino sosial şəbəkə hesabında paylaşım edərək dünyanın müxtəlif ölkələrindən 189 komandanın Azərbaycanda bir araya gələcəyini bildirib.
FIFA prezidenti turnirin əhəmiyyətini belə qiymətləndirib:
"Dünyanın hər yerindən 189 komandanın bir araya gəldiyi Bakıda 15 yaşadək futbolçular arasında ilk FIFA dünya çempionatı və festivalının keçirilməsi üçün hər şey hazırdır.
Bu tarixi turnir futbolun harada yaşamasından asılı olmayaraq hər kəsə məxsus olduğuna dair bütün dünyaya güclü mesajdır. Uşaqların gələcəyinə sərmayə yatırmaqla və futbola olan ortaq sevgimiz vasitəsilə insanları birləşdirməklə biz sevinc bəxş edir, arzuların gerçəkləşməsinə kömək edirik".
İnfantino Azərbaycan Futbol Federasiyaları Assosiasiyasının (AFFA) prezidenti Rövşən Nəcəfin və qurumun əməkdaşlarının gördükləri işi də yüksək qiymətləndirib:
"Dostum, Azərbaycan Futbol Federasiyaları Assosiasiyasının prezidenti Rövşən Nəcəfi və AFFA-nın bütün komandasını gördükləri böyük işə və futbola bağlılıqlarına görə təbrik edirəm.
Hazırda Azərbaycanda olan bütün futbolçulara, məşqçilərə və əməkdaşlara uğurlar arzulayıram. Hər anın dadını çıxarın və tarix yazın!"
FIFA turnirin təşkilati hazırlığı ilə bağlı diqqətçəkən məlumat da yayıb. Qurumun bildirdiyinə görə, dünya çempionatının oyunlarının böyük hissəsinin keçiriləcəyi Hövsan yarış kompleksi cəmi 66 gün ərzində inşa olunub.
Qeyd edək ki, Azərbaycanda ilk dəfə təşkil olunan U-15 dünya çempionatı və FIFA festivalının yekun qarşılaşmaları oktyabrın 30-da keçiriləcək.
