PSJ azarkeşlərinin mişarlı və 'qətliam' pankartı ilə UEFA-ya şikayəti

"Barselona" Çempionlar Liqasının əsas mərhələsinin üçüncü turunda PSJ azarkeşlərinin nümayiş etdirdiyi təxribat xarakterli performansla bağlı UEFA-ya şikayət ünvanlayıb.

İdman.Biz xəbər verir ki, hadisə oktyabrın 20-də Parisdəki "Park de Prens" stadionunda baş verib. Həmin qarşılaşmada meydan sahibləri Kataloniya təmsilçisinə 4:2 hesabı ilə qalib gəliblər.

Matç başlamazdan əvvəl PSJ azarkeşləri tribunalardan birində nəhəng pankart açıblar. Pankartda maskalı, Paris klubunun formasını geyinmiş şəxsin benzinlə işləyən mişarla "Barselona"nın emblemini parçaladığı təsvir olunub.

Kompozisiya fransız dilində "Massacre à la parisienne" – "Paris üslubunda qətliam" şüarı ilə müşayiət edilib.

Reuters-in məlumatına görə, azarkeşlər bu təsviri 1974-cü ildə çəkilmiş məşhur Amerika qorxu filmi "Texas Chainsaw Massacre"dən ("Texasda mişarlı qətliam") ilhamlanaraq hazırlayıblar.

"Barselona"nın nümayəndəsi agentliyə bildirib ki, qarşılaşmadan sonra klub pankartın məzmunu, eləcə də tribunalardan səsləndirilən təhqiramiz şüarlarla bağlı UEFA nümayəndəsinə rəsmi şikayət edib.

İspaniyanın Cadena SER nəşrinin məlumatına görə, Kataloniya klubu həmin görüntüləri son dərəcə narahatedici və qəbuledilməz hesab edib. "Barselona"nın fikrincə, bu cür təsvirlər idmanda zorakılığa və nifrətə çağırış mesajı verir.

Klub nümayəndələri "Barselona"ya qarşı yönəlmiş bəzi təhqiramiz plakatlardan da narazılıqlarını bildiriblər.

Maraqlıdır ki, Fransanın L'Équipe nəşrinin yazdığına əsasən, PSJ rəhbərliyi azarkeşlərin hazırladığı performansı əvvəlcədən təsdiqləyib. Lakin Paris klubu Reuters-in müraciətinə material dərc olunanadək münasibət bildirməyib.

UEFA-nın İntizam Reqlamentinin 16.2(e) maddəsinə əsasən, idman tədbirinin xarakterinə uyğun olmayan təxribatçı mesajların jestlər, sözlər, əşyalar və digər vasitələrlə ötürülməsi intizam tədbirlərinə səbəb ola bilər.

Belə pozuntuya görə ilk dəfə tətbiq edilən standart cərimə 10 min avro təşkil edir. Bununla belə, yekun qərar UEFA-nın intizam orqanlarının qiymətləndirməsindən asılı olacaq.

Beləliklə, PSJ-nin "Barselona" üzərində qazandığı qələbənin futbol meydanından kənarda da davamı ola bilər.