Idman.biz
"Mançester Yunayted"in kapitanı Brunu Fernandeş UEFA Çempionlar Liqasının əsas mərhələsinin üçüncü turunda "Komo"ya 1:4 hesablı məğlubiyyətdən sonra komandasının çıxışını qiymətləndirib.
İdman.Biz xəbər verir ki, portuqaliyalı yarımmüdafiəçi səfər qarşılaşmasından sonra verdiyi müsahibədə komandanın həm topsuz hərəkətlərində, həm də rəqibə təzyiq göstərməkdə problemlər yaşadığını etiraf edib.
Fernandeş deyib: "Bəzən təzyiq altında daha cəsarətli oynamalıyıq. Bu, bizim başımıza ilk dəfə gəlmir. Yenə oyuna uğursuz başladıq. Topa kifayət qədər təzyiq göstərmirik, topsuz hərəkətlərimiz də lazımi səviyyədə deyil. Çox şey istədiyimiz kimi getmir. Oyunun əvvəlində buraxdığımız qol elə hiss yaradır ki, sanki artıq məğlub olmuşuq.
Öz oyunumuzu oynamalı, irəli getməyə çalışmalı, daha cəsarətli davranmalı, topa sahib olmalı və qol vəziyyətləri yaratmalıyıq. Əgər bunları bacarmırıqsa, bu vəziyyətdən çıxmaq çox çətin olacaq. Topu rəqibə verəndə onun özünəinamı artır. Biz daha çox qaçmağa məcbur oluruq. Sonra topu geri qazandıqda isə həm ayaqlarımızın, həm də beynimizin düzgün işləməsi xeyli çətinləşir".
Kapitan "Komo"ya qarşı fərdi müdafiədən istifadə edilməməsi barədə qərara da münasibət bildirib:
""Komo"ya qarşı fərdi nəzarətlə oynamamaq qərarını məşqçilər korpusu verib. Maykl Karrik taktiki baxımdan səhvə yol veribmi? Bu, baş məşqçinin və onun köməkçilərinin işidir, mənim yox. Bəzən təzyiq altında daha cəsarətli olmalı, risk etməli və rəqibi narahat vəziyyətə salmaq üçün yüksək pressinq tətbiq etməliyik".
