Lent.az
"Osasuna" La Liqa oyununun nəticələrindən sonra "Barselona"nı FİFA qaydalarını pozmaqda ittiham edərək apelyasiya şikayəti verib.
Lent.az xəbər verir ki, martın 27-də La Liqanın 27-ci turunun təxirə salınmış oyununda "Barselona" öz meydanında rəqibini məğlub edib. Kataloniyalılar Ferran Torres, Dani Olmo və Robert Levandovskinin qolları sayəsində 3:0 hesabı ilə qalib gəliblər.
"Osasuna klubu" İspaniya Kral Futbol Federasiyasına (RFEF) "Barselona"nın müdafiəçisi İniqo Martinezin oyunda qeyri-qanuni iştirak etməsinə görə şikayət edib.
Pamplona klubunun məlumatına görə, futbolçunun meydançaya çıxması FİFA qaydalarını pozub. Beynəlxalq federasiyanın reqlamentinə əsasən, sağlamlığına görə milli komandanı tərk edən idmançılar beynəlxalq fasilə bitdikdən sonra klub oyununa qayıtmazdan əvvəl beş təqvim günü buraxmalıdırlar.
Şikayətə əsas kimi martın 17-də RFEF-in Martinezin tibbi səbəblərə görə İspaniya millisindən uzaqlaşdırıldığını rəsmən elan etməsi olub.
Xatırladaq ki, "Osasuna" 28 oyundan 33 xalla ölkə çempionatının turnir cədvəlində 14-cü yerdədir. Turnir cədvəlinə 28 oyundan sonra 63 xalla "Barselona" başçılıq edir. "Osasuna"nın növbəti oyunu "Atletik"lə səfərdə, "Barselona" isə evdə "Jirona" ilə qarşılaşacaq. Hər iki görüş martın 30-da baş tutacaq.
