Report.az
Sablyaçıların şəxsi yarışında gözlədiyimdən yaxşı çıxış etdim.
Bunu "Report"a açıqlamasında Azərbaycan qılıncoynadanı Anna Başta Yunanıstanın Heraklion şəhərində keçirilən Dünya Kuboku ilə bağlı danışarkən deyib.
28 yaşlı idmançı Paris-2024 Yay Olimpiya Oyunlarından sonra ilk dəfə beynəlxalq turnirə qatıldığını xatırladıb:
"Bu yarışa yaxşı hazırlaşmışdım. 200-dən çox iştirakçı arasında 12-ci oldum. Halbuki uzun müddətdən sonra qatıldığım turnirdə məqsəd yenidən rəqabəti hiss etmək, gücümü yoxlamaq idi. Qrupda 6 görüşün 5-də qələbə qazandım. Bu nəticə mənə birbaşa əsas mərhələyə yüksəlmək üçün kifayət etdi. Ən güclü "64-lük"də 3 görüş keçirdim. Ən güclü "səkkizliy"ə yüksəlmək üçün keçirilən qarşılaşmada uduzdum. Uzun müddətdən sonra qatıldığım ilk beynəlxalq turnirdə göstərdiyim nəticədən razıyam".
A.Başta növbəti gün komanda yarışında qüvvələrini sınadıqlarını vurğulayıb:
"Macarıstan millisi ilə qarşılaşmada zədələndim. Hələ ki, zədənin nə qədər davam edəcəyi bəlli deyil. Həkimlə danışmaq imkanım olmayıb. Lakin inanıram ki, zədəmin sağalması uzun çəkməyəcək. Bu dəfə mental və emosional olaraq daha hazırlıqlıyam. Bəlli bir fəaliyyət planı var. Təbii ki, zədələnməyimə görə təəssüflənirəm. Bir çox idmançılar mənə dəstək oldular. Lakin zədə idmanın ayrılmaz hissəsidir və hər bir idmançının başına gələ bilər. Təmkinli olub, səbrlə yenidən yarışlara qayıtmağı gözləməlisən".
Qeyd edək ki, Azərbaycan millisi Dünya Kubokunun komanda yarışında dördüncü yeri tutub.
