Idman.biz
Gürcüstanın Qori şəhərində böyüklər arasında cüdo üzrə Avropa Kuboku başa çatıb.
İdman.Biz xəbər verir ki, Azərbaycan millisi turnirdə doqquz medal qazanıb. Yarışda ölkəmiz 24 cüdoçu ilə təmsil olunub. Beynəlxalq Cüdo Federasiyasının məlumatında Qori Avropa Kubokunda 18 ölkədən 191 idmançının iştirak etdiyi göstərilir.
Yarışın ikinci günündə Azərbaycan təmsilçilərindən Nihad Şıxəlizadə, Xəyyam Əliyev, Əjdər Bağırov, Şahin Əsədov, Elmar Qasımov, Qurban Məmmədli, Diana Tskayeva və Ülviyyə Bayramova tatamiyə çıxıblar.
Günün yekununa əsasən, Əjdər Bağırov qızıl medal qazanıb. Diana Tskayeva, Xəyyam Əliyev və Elmar Qasımov isə bürünc mükafata sahib olublar.
Beləliklə, Azərbaycan cüdoçuları Avropa Kubokunu iki qızıl, bir gümüş və altı bürünc medalla tamamlayıblar. Millimiz ümumi hesabda üçüncü yeri tutub. Kişilərdən ibarət komandaların sıralamasında isə Azərbaycan ikinci olub.
13:00
Bu gün Gürcüstanın Qori şəhərində böyüklər arasında cüdo üzrə Avropa Kubokuna yekun vurulacaq.
İdman.Biz xəbər verir ki, Azərbaycan yarışda 24 idmançı ilə təmsil olunur. Onlardan 18-i kişi, 3-ü qadındır.
Yarışın ikinci günündə səkkiz azərbaycanlı cüdoçu tatamiyə çıxacaq. 90 kq çəki dərəcəsində Nihad Şıxəlizadə və Xəyyam Əliyev mübarizə aparacaq. 100 kq-da Əjdər Bağırov, Şahin Əsədov və Elmar Qasımov çıxış edəcək. +100 kq çəkidə isə Qurban Məmmədli qüvvəsini sınayacaq.
Qadınların yarışında Diana Tçkayeva (48 kq) və Ülviyyə Bayramova (57 kq) medal uğrunda mübarizə aparacaq.
Qeyd edək ki, turnirdə 18 ölkədən 191 cüdoçu iştirak edir. Hazırda Azərbaycan millisinin aktivində beş medal var -bir qızıl, bir gümüş və üç bürünc.
