Idman.biz
Artıq bir neçə gündür Serbiyanın Zlatibor şəhərində məktəblilər arasında keçirilən Avropa çempionatında Azərbaycan komandasının məşqçisi ilə makedoniyalı hakim arasında baş verən insidenti müzakirə olunur.
İdman.biz xəbər verir ki, azərbaycanlı boksçu Yusif Ağakişiyev serbiyalı rəqibi Viktor Maystroviçə qarşı final döyüşündə aşkar üstünlük nümayiş etdirib, qızıl medala çox yaxın olsa da, rinqdəki hakim Stefan Subalevski qələbəni bizim idmançıdan "oğurladı".
Boksçumuzun üstünlüyünün nokauta çevriləcəyini anlayan hakim, idmançıların dediyi kimi, Yusifi cəzalarla "boğmağa" başlayaraq layiq olduğu qələbədən məhrum etdi.
Buna cavab olaraq, Yusifin məşqçisi, federasiyamız tərəfindən Özbəkistandan dəvət olunmuş texniki direktor Xamza Avezov hakimə fiziki müdaxilə edib – qəzəblə onun üstünə atılaraq, az qala, onu boğacaqdı. Bu hadisə rinqdə kütləvi davaya səbəb olub ki, vəziyyəti sakitləşdirmək böyük çətinliklə mümkünləşib.
Nəticədə azərbaycanlı boksçu həm də gümüş medaldan məhrum edilib. Xamza Avezovun taleyi isə yaxın günlərdə Avropa və Azərbaycan Boks Federasiyaları tərəfindən müəyyən ediləcək.
Özbəkistanlı mütəxəssis Caliber.az saytının suallarını cavablandırıb:
- Xamza, zəhmət olmasa deyin, niyə belə etdiniz? Sadəcə döyüşdən sonra etiraz təqdim etmək olmazdımı?
- Birincisi, məktəblilər arasında keçirilən Avropa çempionatı kimi yarışlarda rəsmi etiraz proseduru, ümumiyyətlə, tətbiq olunmur. Bu da belə hakim özbaşınalığına yol açır. Bunu birinci dəfə deyil ki, görürəm.
İkincisi, ən ağrılısı odur ki, bu cür haqsızlıqlar ən çox azərbaycanlı boksçulara qarşı edilir. Yəni demək olar ki, hər yaş kateqoriyasında favorit olan bizim uşaqlara. Halbuki bu, yeniyetmələrin psixologiyasını məhv edir. Buna görə də özümü saxlaya bilmədim…
- Baş verənlərə görə peşman deyilsiniz? Həmin an nə düşünürdünüz? Axı sizə ömürlük diskvalifikasiya və ya azı bir neçə illik cəza verilə bilər...
- Yox, həmin an ağlıma heç bir cəza gəlmirdi! Mən yalnız bizim boksçunun vəziyyətini düşünürdüm. O hakim idmançının haqqını hər kəsin gözü qarşısında oğurladı, çox ağır psixoloji zərbə vurdu!
- Lakin son 30 ildə bizim boksçularımızdan bir çox qələbə alınsa da, heç bir məşqçi, o cümlədən legioner, belə bir addım atmayıb...
- Bilirsiniz, mən indiyə qədər nə olub-olmadığını deyə bilmərəm. Amma inanıram ki, bundan sonra nələrin baş verəcəyini hamı görəcək. Ümid edirəm ki, hakimlər artıq yüz ölçüb bir biçəcəklər, yəni azərbaycanlı boksçulara qarşı belə haqsızlıqlara yol verməyəcəklər. İstərdim ki, başa düşsünlər – bizim uşaqlarla belə davranmaq olmaz! Xüsusilə də bizim boksçular çox güclüdür və istənilən səviyyəli yarışlarda qalib gəlmək potensialına malikdir. Əminəm ki, bu hadisədən sonra hakimlər Azərbaycanla hesablaşmalı olacaqlar!
- Bəs indi sizi nə gözləyir?
- Bilmirəm. Yaşayarıq, görərik. Amma baş verənlərə görə peşman deyiləm və əminəm ki, işsiz qalmayacağam.
İdman.biz
