Idman.biz
Serbiyanın Zlatibor şəhərində məktəblilər arasında keçirilən boks üzrə Avropa birinciliyində qalmaqal yaşanıb. Azərbaycanlı idmançı Yusif Ağakişiyevlə serbiyalı Viktor Maystoroviç arasındakı döyüş zamanı texniki direktor Hamza Avezov hakim qərarlarına etiraz olaraq rinqə çıxıb.
İdman.biz xəbər verir ki, boksçumuz Yusif Ağakişiyev "Qafqazinfo"ya açıqlamasında baş verən hadisədən danışıb.
O bildirib ki, referinin ədalətsizliyi ilə üzləşib: "Final görüşündə yerli idmançı ilə üz-üzə gəlirdim. Rəqibimdən üstün idim və qızıl medal qazana bilərdim. Amma hakimlər başqa cür qərar verdilər. Mənə qarşı haqsızlıq oldu. Təmiz qələbəmi əlimdən aldılar. Məşqçim Hamza Avezov buna dözmədi və rinqə daxil oldu. Nəticədə bu cür vəziyyət yarandı. Düşünürəm ki, hakimlərin bu cür qərarlarının səbəbi rəqibin yerli olması idi. Saxtakarlıq olundu, qələbə rəqibə verildi".
Ağakişiyev etirazlara baxmayaraq, hakimlərin heç bir cavab vermədiyini də vurğulayıb: "Etiraz oldu, amma hakimlərdən heç bir cavab gəlmədi. Onlar verdikləri qərarı saxladılar. Bu cür halla ilk dəfə idi rastlaşırdım. Bəzən boksda bu cür hallar olur. Yerli idmançılara güzəşt edilir".
İdman.biz
