Report.az
"Murov Az Terminal"ın kişi voleybolçulardan ibarət komandası Azərbaycan çempionatının yeni mövsümündə çempionluq uğrunda mübarizə aparacaq.
Bu barədə "Report"a klubun baş meneceri Şiraslan Kərimov bildirib.
Klub rəsmisi daha güclü komanda formalaşdırdıqlarını bildirib:
"Artıq iki ildir ölkə çempionatında gümüş medalın sahibi oluruq. Turnir ərzində sabit çıxış etsək də, finalda nələrsə çatmır. Ötən mövsümlə müqayisədə çox güclü komanda yığmışıq. Yeni baş məşqçi dəvət etmişik və 1 illik müqavilə bağlamışıq. Yeni mövsümdə çempionluq uğrunda mübarizə aparacağıq. Ümid edirəm ki, istəyimizə çatacağıq".
O, komandanın yeni kapitanının müəyyənləşdiyini də nəzərə çatdırıb:
"Heyətdə dəyişikliklər həyata keçirmişik. Çox yaxşı legionerlərimiz var. 5 əcnəbi voleybolçu götürmüşük. Ötən mövsümün ən yaxşı oyunçusu seçilən Aleksey Samoylenko komandada qalacaq və kapitan olacaq".
Ş.Kərimov əsas heyətə klubun yetirmələrini də dəvət etdiklərini söyləyib:
"Heyətə "Murov Az Terminal"ın yetirmələri olan voleybolçuları da dəvət etmişik. Əsas hədəfimiz yerli oyunçuların inkişafıdır. Artıq yaşlı voleybolçuları komandaya götürməməyə qərar vermişik. Yeni oyunçularımız 17-18 yaşındadırlar. Legionerlərlə birgə oynamaq onların inkişafı üçün çox böyük fürsətdir".
Qeyd edək ki, "Murov Az Terminal" ötən mövsüm Azərbaycan Yüksək Liqasının gümüş medallarını qazanıb.
#"Murov Az Terminal" #Voleybol #Azərbaycan Yüksək Liqası #çempion
