Idman.biz
Azərbaycan voleybol klubu "Ordu" çempionatın altı turundan sonra üçüncü pillədə qərarlaşıb. Sezonun əvvəlində iki məğlubiyyətdən sonra komanda ardıcıl dörd qələbə qazanıb. "Hərbçilər" mövsümün əvvəlində heyəti xeyli gücləndirib və yeni transferlərdən biri də braziliyalı Mateus Arauxо olub. O, İdman.Biz-in suallarını cavablandırıb.
- Klubun mövsümün əvvəlindəki çıxışından nə dərəcədə razısınız?
- Çempionatın startını çox müsbət qiymətləndirirəm. Komanda yaxşı hazırlaşıb, meydançada tez uyğunlaşdıq və ilk oyunlardan xarakter nümayiş etdirdik. Əlbəttə, üzərində işləməli olduğumuz məqamlar var, lakin ümumilikdə "Ordu"nun liqadakı çıxışı sevindiricidir.
- Dörd oyundan ibarət qələbə seriyasını nəzərə alsaq, "Ordu" mükafatlar uğrunda mübarizəyə qoşulmağı hədəfləyir?
- Şübhəsiz. Ambisiyalarımızı gizlətmirik. Qələbələr bizə əlavə inam verir və indi əsas məsələ konsentrasiyanı qorumaqdır. Qarşıda uzun mövsüm var, lakin biz ən yüksək yerlər uğrunda mübarizə aparmaq və bunu hər oyunda sübut etmək istəyirik.
- Siz artıq ikinci ildir Azərbaycanda çıxış edirsiniz, bundan əvvəl "Neftçi"nin formasını geyinmisiniz. Çempionatın səviyyəsini necə dəyərləndirirsiniz?
- Liqa çox yaxşı sürətlə inkişaf edir. Burada kifayət qədər güclü legionerlər, istedadlı yerli oyunçular və yüksək təşkilati səviyyə var. İlk mövsümlə müqayisədə irəliləyiş açıq-aşkar görünür və bu, çempionatı daha rəqabətli və maraqlı edir.
- Bakıda sevdiyiniz yerlər varmı?
- Bəli, Bakı şəhərini çox sevirəm. Bulvar boyunca gəzməkdən, İçərişəhərə baş çəkməkdən zövq alıram. Orada xüsusi ab-hava, tarix və memarlıq var. Yerli mətbəx də çox xoşuma gəlir – həm zəngin, həm də çox dadlıdır.
- Komandada sizinlə yanaşı daha iki braziliyalı çıxış edir. Bu amil uyğunlaşmanı asanlaşdırır?
- Əlbəttə. Eyni dildə danışmağımız həm meydançada, həm də gündəlik həyatda bir-birimizi daha yaxşı başa düşməyimizə kömək edir. Çətin anlarda qərarları daha tez vermək mümkün olur. Amma onu da vurğulamaq istərdim ki, ümumilikdə komandada çox yaxşı qarşılıqlı anlaşma var.
- Siz Braziliya, Qətər, Livan, Yunanıstan, Portuqaliya liqalarında çıxış etmisiniz, Litvada isə çempionatın ən yaxşı diaqonal hücumçusu seçilmisiniz. "Ordu"da da bombardirlik uğurlarınızı davam etdirməyi düşünürsünüz?
- Fərdi mükafatlar xoşdur, amma mənim üçün hər zaman əsas olan komandanın nəticəsidir. Əgər topladığım xallar və oyunum "Ordu"nun qələbələrinə və titullar uğrunda mübarizəsinə töhfə verirsə, deməli, hər şey düzgün gedir. Maksimumumu ortaya qoymağa çalışıram və ümid edirəm ki, bu mövsüm həm mənim, həm də klub üçün uğurlu olacaq.
Zəki Feyzullayev
