Idman.biz
Azərbaycanın qadın voleybol komandaları arasında Yüksək Liqanın 10-cu turunda ölkənin son çempionu "Azərreyl" gərgin mübarizədə "Gəncə"yə 1:3 hesabı ilə məğlub olub (19:25, 25:21, 19:25, 23:25).
"Azərreyl"in kapitanı Nayka Benites komandanın son oyununu İdman.Biz-ə şərh edib:
"Bu, bizim üçün çətin oyun oldu. Bəzi oyunçular hələ də heyətdə yox idi, ona görə də asan deyildi".
Bu mövsüm "Azərreyl"in çıxışlarında çətinliklər və qeyri-sabitlik müşahidə olunur. N. Benitesin sözlərinə görə, "yüksəliş" və "enmə"lərin növbələşməsi daimi zədələr və oyunçu çatışmazlığı ilə bağlıdır: "Biz hələ də komandanı tam şəkildə bir araya gətirə bilməmişik. Amma məqsədimiz dəyişməz qalır – finala çıxmaq".
Puerto-Rikodan olan libero artıq ikinci mövsümdür komandada çıxış edir. O, çempionluq mövsümünü hazırkı mövsümlə müqayisə edib: "Keçən mövsüm xeyli fərqli idi. Düşünürəm ki, o vaxt daha asan idi, çünki inkişaf etmək üçün lazım olan bütün resurslarımız var idi. Bu mövsümə hazırlaşmaq isə çətin oldu".
Kapitan qeyd edib ki, bu rol böyük məsuliyyət tələb edir: "Kapitan olmaq asan deyil. Amma komanda yoldaşlarım bunun öhdəsindən gəlməyə kömək edirlər".
Naika Benites Azərbaycan çempionatının yaxşı səviyyədə olduğunu vurğulayıb, eyni zamanda inkişaf üçün imkanların mövcudluğunu da qeyd edib: "İnanıram ki, liqa potensialından istifadə edərək daha da yaxşı və tamaşaçılar üçün daha cəlbedici ola bilər. Onun böyük perspektivləri var".
Qeyd edək ki, "Azərreyl"in qadınlardan ibarət komandası Azərbaycanın son üç çempionatının qalibi olub.
