Idman.biz
Türkiyəli gənc qrossmeyster Yağız Kaan Erdoğmuş daha bir güclü rəqibini məğlub edərək dünya reytinqində 38-ci pilləyə yüksəlib.
İdman.Biz xəbər verir ki, 14 yaşlı Erdoğmuş Hollandiyanın Veyk-an-Zee şəhərində keçirilən "2026 Tata Steel Masters" turnirində növbəti parlaq qələbəsini qazanıb.
Gənc qrossmeyster turnirin növbəti turunda dünya reytinqində 59-cu pillədə qərarlaşan, 2656 Elo xalı olan çex qrossmeyster Thai Dai Van Nquyeni məğlub edib. Bununla da Erdoğmuş son dörd partiyada üçüncü qələbəsini əldə edib.
Bu nəticədən sonra Yağız Kaan Erdoğmuşun Elo reytinqi 2688-ə yüksəlib. O, dünya sıralamasında 38-ci yerə qalxaraq karyerasında növbəti mühüm irəliləyişə imza atıb. Turnirdə liderdən cəmi yarım xal geri qalan gənc şahmatçı hazırda üçüncü pillədə qərarlaşıb.
Qeyd edək ki, Yağız Kaan Erdoğmuş hazırda Azərbaycanın tanınmış qrossmeysteri, 20 yaşadək şahmatçılar arasında ikiqat Dünya çempionu Şəhriyar Məmmədyarovun rəhbərliyi altında məşq edir. Mütəxəssislər onun son dövrdəki sürətli inkişafını məhz bu əməkdaşlıqla əlaqələndirirlər.
2688 Elo xalı Yağız Kaan Erdoğmuşu elit "2700 klubu"na bir addım da yaxınlaşdırıb. Gənc qrossmeysterin növbəti turdakı rəqibi isə dünya çempionu Dommaraju Gukeş olacaq.
