Idman.biz
Yunanıstanın Rodos adasında şahmat üzrə klublararası Avropa Kuboku turnirinə yekun vurulub. Turnirdə Azərbaycanı təmsil edən "Vüqar Həşimov" klubu son tura qədər medallar uğrunda mübarizə aparsa da, yekunda səkkizinci yeri tutub.
Komandanın lideri təcrübəli qrossmeyster Rauf Məmmədov olub. O, son həftələrdə ardıcıl üç böyük yarışda iştirak edib - Səmərqənddə (Özbəkistan) keçirilən "Grand Swiss" yarışı, Batumidə (Gürcüstan) baş tutan Avropa milli komandalarının çempionatı və Rodostakı (Yunanıstan) klublararası Avropa Kuboku turniri.
İdman.Biz-ə müsahibəsində Rauf Məmmədov etiraf edib ki, xüsusilə son turda oyununun zəifləməsinə yorğunluq təsir göstərib. Buna baxmayaraq, o artıq Hindistanda keçiriləcək Dünya Kubokuna hazırlaşır.
- Turnirdən hansı təəssüratlar qaldı? Xüsusilə də nəzərə alsaq ki, son tura qədər medal qazanmağa iddia edirdiniz.
- Bəli, əgər güclü Çexiya klubu "Yeni Bor"u məğlub etsəydik, ikinci və ya üçüncü yeri tuta bilərdik. Amma son turda məndə bir növ "kollaps" baş verdi. Gedişləri səhv saldım və hazırladığım planı tətbiq edə bilmədim. Partiyadan 20 dəqiqə əvvəl ideyanı müəyyənləşdirmişdim, amma oyun zamanı hər şey qarışdı. Görünür, yorğunluğun təsiri idi - ardıcıl üç turnirdə oynamaq, əlbəttə, çətindir.
Amma uşaqlar əla mübarizə apardılar. Aydındır ki, şahmat üzrə Avropa Kubokunda medallar uğrunda döyüşmək bizim üçün asan deyil. Biz, demək olar ki, öz gücümüzə, ictimai əsaslarla oynayırıq. Fikrimcə, biz hələ medallar uğrunda mübarizəni davam etdirəcəyik. Ümumilikdə hesab edirəm ki, layiqli çıxış etdik.
- Son vaxtlar doğrudan da çox sıx qrafikiniz var. Məsələn, yaxınlarda Batumidə keçirilən Avropa komandalar çempionatında Azərbaycan millisinin heyətində "gümüş" medal qazandınız...
- Qitə birinciliyində normal oynadım, yalnız ilk turda David Navara ilə partiyada onun evdə hazırladığı variantın "toruna" düşdüm. Son turda da, əslində, eyni hal baş verdi. Amma Avropa çempionatında ən vacib anda - Ukrayna ilə oyunda Andrey Volokitini məğlub etməklə əhvalım yüksəldi (gülür).
Avropa çempionatının gümüş medalı bizim üçün uğurdur, çünki son səkkiz ildə komanda yarışlarında medal qazana bilməmişdik. Hamı bu nailiyyətdən yazdı. Əlbəttə, uğursuzluğumuz zamanı yazmağı sevənlər də var (gülür). Amma ümumilikdə nəticə yaxşıdır.
- Qarşıda Hindistanda keçiriləcək Dünya Kuboku var. Yarış 30 oktyabrda start götürəcək.
- Bəli. Reytinqimə görə ikinci dövrədən başlayacağam, amma biletləri beş gün əvvəldən almışam. Buna görə peşman deyiləm - istirahət etməyə və yuxunu bərpa etməyə vaxtım olacaq. Hazırda bu mənim üçün xüsusilə vacibdir.
- Məlumdur ki, Hindistan spesifik ölkədir, xüsusilə də qidalanma baxımından. Qidalanma məsələsində ehtiyatlı olacaqsınız?
- Mən orada artıq oynamışam - Çennayda və hətta 2009-cu ildə. Acılı yeməkləri sevdiyim üçün Hindistan mətbəxi ilə bağlı problemim yoxdur (gülür). Eşitmişəm ki, orada təhlükəsizliklə bağlı da hər şey qaydasındadır, buna görə narahat deyiləm.
- Sizcə, ikinci dövrədə rəqibiniz kim olacaq?
- Böyük ehtimalla, təxminən 2 620 reytinqə malik alman qrossmeysteri Svan Rasmus. Əlbəttə, o, əvvəlcə ilk rəqibini keçməlidir, amma açıq favorit odur. Sonra isə, hər şey yaxşı getsə, addım-addım irəliləyib hər rəqibi ayrıca təhlil edəcəyik. Əsas odur ki, yaxşı istirahət edim, çünki Avrokubokun son turunda yorğunluq diqqətimə ciddi təsir göstərmişdi.
- Dünya Kubokunda konkret hədəfiniz varmı?
- Bəli, hədəfim var. Bakıdakı Dünya Kuboku göstərdi ki, heç nə mümkünsüz deyil (2023-cü ildə Bakıda keçirilən Dünya Kubokunda Nicat Abbasov dördüncü yeri tutmuşdu). Əgər bəxt və digər amillər üst-üstə düşsə, hər şey mümkündür.
Teymur Tuşiyev
