Idman.biz
Azərbaycan qadınlar arasında şahmat üzrə ölkə çempionatının yarımfinal partiyasında Ayan Allahverdiyeva ilə Türkan Məmmədyarova arasında nəticənin ləğvi ilə bağlı vəziyyətin təfərrüatları məlum olub.
Azərbaycan Şahmat Federasiyasından İdman.Biz-ə bildirilib ki, sözügedən epizodda hakim Türkan Məmmədyarovaya qələbə verərkən səhvə yol verib.
Partiya zamanı Ayan Allahverdiyeva rəqibinə iki dəfə heç-heçə təklif edib və hakim bunu qaydaların pozulması kimi qiymətləndirib. Halbuki, iki dəfə heç-heçə təklif etmək Beynəlxalq Şahmat Federasiyasının (FİDE) reqlamentinə zidd deyil və bu fakt ölkə çempionatının Apellyasiya Komitəsi tərəfindən də təsdiqlənib. Nəticədə Türkan Məmmədyarovanın qələbəsi ləğv edilib və partiyada heç-heçə qeydə alınıb.
Federasiyada həmçinin bildirilib ki, Ayan Allahverdiyeva heç-heçə təklif edərkən nizamnaməyə tam uyğun davranmayıb, lakin bu pozuntuya görə şahmatda məğlubiyyət verilmir.
Beləliklə, şahmatçılar çərşənbə günü Azərbaycan çempionatının yarımfinal mərhələsində münasibətlərinə aydınlıq gətirməyə davam edəcəklər, görüşdə hesab 0,5:0,5-dir.
Teymur Tuşiyev
10:26
Şahmat üzrə Azərbaycan çempionatının yarımfinal mərhələsinin ilk oyununda Ayan Allahverdiyeva ilə Türkan Məmmədyarova arasında keçirilmiş partiyanın nəticəsinə yenidən baxılıb.
İdman.Biz xəbər verir ki, bu barədə Şahmat Federasiyası məlumat yayıb.
Bildirilib ki, fevralın 17-də baş tutan qarşılaşmada hakimlər kollegiyasının qərarına əsasən Ayan Allahverdiyeva tərəfindən iki dəfə əsassız iddia irəli sürüldüyü qeyd edilərək partiya Türkan Məmmədyarovanın xeyrinə hesablanıb.
Qərarla razılaşmayan Ayan Allahverdiyeva Azərbaycan Çempionatının Apellyasiya Komitəsinə müraciət edib.
Apellyasiya Komitəsi tərəfindən partiyanın videoyazısı və gedişlərin ardıcıllığı araşdırılıb. Beynəlxalq Şahmat Federasiyasının (FIDE) qüvvədə olan qaydalarına əsasən Ayan Allahverdiyevanın etirazı təmin olunub.
Apellyasiya Komitəsinin qərarına əsasən Türkan Məmmədyarovanın qələbəsi ləğv edilib və tərəflər arasında keçirilən ilk partiyanın nəticəsi heç-heçə kimi rəsmiləşdirilib.
Türkan Məmmədyarova Apellyasiya Komitəsinin qərarı ilə razılaşdığını bildirib.
Qeyd edək ki, bu görüntü oyun bitdikdən sonra qeydə alınıb.
