Idman.biz
Azərbaycan qrossmeysteri Şəhriyar Məmmədyarov dünya reytinqindəki mövqeyini qoruyub.
İdman.Biz-in məlumatına görə, Beynəlxalq Şahmat Federasiyası (FIDE) 2025-ci il noyabrın 1-nə olan vəziyyətə əsasən şahmatçıların reytinq siyahısını yeniləyib.
Yenilənmiş məlumatlara əsasən, Məmmədyarovun göstəricisi son bir ayda çoxsaylı partiyalar oynamasına baxmayaraq dəyişməz qalıb - 2742 xal və 14-cü yer. Bununla belə, dekabr reytinqində bu rəqəmlərin dəyişməsi mümkündür, çünki şahmatçı Hindistanda keçiriləcək Dünya Kubokunda çıxışa başlayır.
FIDE-nin "top-100" reytinqindəki digər azərbaycanlı qrossmeysterlərin mövqeləri isə belədir: Teymur Rəcəbov (2692) – 35-ci yer, Rauf Məmmədov (2646) – 76-cı, Eltac Səfərli (2644) – 77-ci.
FIDE-nin dünya reytinqində ilk onluq aşağıdakı kimidir:
Maqnus Karlsen (Norveç, 2839)
Hikaru Nakamura (ABŞ, 2813)
Fabiano Karuana (ABŞ, 2795)
Vinsent Keymer (Almaniya, 2773)
Aniş Qiri (Niderland, 2769)
Arjun Erigaisi (Hindistan, 2769)
Rameşbabu Praqnanandxa (Hindistan, 2768)
Uesli So (ABŞ, 2764)
Dommaraju Qukeş (Hindistan, 2763, dünya çempionu)
Alireza Firuzca (Fransa, 2762)
Bu arada, yenilənmiş reytinqdə azərbaycanlı qadın şahmatçıların mövqeləri belədir: Ülviyyə Fətəliyeva (2420) - 33-cü yer, Günay Məmmədzadə (2390) - 54-cü, Gövhər Beydullayeva (2358) - 78-ci, Xanım Balacayeva (2350) - 87-ci.
Qadınların dünya reytinqində ilk onluq isə aşağıdakı kimidir:
Hou Yifan (Çin, 2658)
Zhu Jiner (Çin, 2579)
Lei Jinqjie (Çin, 2569)
Ju Venjun (Çin, 2565, dünya çempionu)
Aleksandra Qoryaçkina (FİDE, 2540)
Hampi Koneru (Hindistan, 2535)
Tan Zhonqyi (Çin, 2524)
Anna Muziçuk (Ukrayna, 2518)
Yekaterina Laqno (Rusiya, 2517)
Bibisara Asaubayeva (Qazaxıstan, 2513).
Teymur Tuşiyev
