Report.az
Yeniyetmələr arasında Azərbaycan çempionatının keçirilməsində əsas məqsəd potensiallı şahmatçıları üzə çıxarmaq olub.
Bunu "Report"a açıqlamasında şahmat üzrə sonuncu Azərbaycan çempionatının iştirakçısı, eyni zamanda məşqçi-müəllim Nicat Məmmədov deyib.
Mütəxəssis 8, 10, 12, 14, 16 və 18 yaşadək oğlanlar və qızlar arasında Gəncə İdman Sarayında keçirilmiş Azərbaycan çempionatını dəyərləndirib:
"Bu il Azərbaycan çempionatı ilk dəfə İsveçrə sistemi üzrə keçirilirdi. İstəyimiz o idi ki, yarışa daha çox gənc şahmatçılar qatılsınlar. Əsasən potensiallı şahmatçıları üzə çıxarmaq istəyirdik. Bu, Azərbaycan Şahmat Federasiyasının prezidenti Mahir Məmmədovun xüsusi tapşırıqlarından biri idi. Məqsəd odur ki, Azərbaycan şahmatı Bakı və Sumqayıtda tanınmasın, bölgələrə yayılsın. Xüsusilə bölgələrdə istedadlı uşaqların olduğuna inanırıq. Düşünürük ki, müəyyən qədər istəyimizə çatdıq. Yarışın təşkilatçılığı yüksək səviyyədə idi. Təbii ki, yarış boyunca gözlənilən və gözlənilməyən nəticələrə şahidlik etdik. Əldə olunan nəticələr yeniyetmə şahmatçılar üçün böyük təcrübə qazandıracaq. Düşünürəm ki, onlar da bu yarışdan razı qaldılar. Azərbaycan Şahmat Federasiyası son vaxtlar gördüyü işlərlə doğru yolda olduğunu sübut edir".
Qeyd edək ki, hər yaş qrupunda mükafatçı olan şahmatçılar müvafiq dərəcəli diplom və medalla təltif olunublar. Azərbaycan çempionları müvafiq yaş qrupunda 2026-cı ilin dünya çempionatı və Avropa çempionatına, 2-ci yeri tutan şahmatçılar müvafiq yaş qrupunda 2026-cı ilin Avropa çempionatına ezam ediləcək. Üçüncü yeri tutan şahmatçılara isə reytinqli beynəlxalq yarışda iştirak üçün 2 000 manatadək maddi dəstək göstəriləcək.
