Idman.biz
Hindistanlı qrossmeyster Leon Mendonka "Ganja Open 2025"şahmat festivalının qalibi olub. A qrupunda keçirilən turnirə müxtəlif ölkələrdən 78 iştirakçı qatılıb. Gələcəyin çempionu sayılan Mendonka mümkün doqquz xaldan yeddisini toplayaraq birinci yeri tutub.
İdman.Biz-lə söhbətində Mendonka turnirlə bağlı təəssüratlarını bölüşüb.
-Leon, siz əvvəlcədən reytinq favoritlərindən biri idiniz və nəticədə birinci yeri qazandınız. Bu uğur sizin üçün gözlənilən oldu?
-Çox sağ olun! Açığı, çox güclü emosiyalar yaşayıram. Gəncə öz atmosferi ilə yadda qaldı - burada çox motivasiyalı və güclü şahmatçılar mübarizə aparırdı. Bu qələbəni karyeramda daha bir böyük addım kimi dəyərləndirirəm.
-Turnirdəki çıxışınızı necə təhlil edərdiniz?
-Stabil oyun göstərdiyim üçün məmnunam. Bəzi partiyalarda müdafiə olunmalı oldum, digərlərində isə kəskin həll yolları tapmağa çalışdım. Ümumilikdə vəziyyətə nəzarəti saxlamağı bacardım və mövqelər çətinləşəndə belə konsentrasiyanı itirməməyə çalışdım.
-Xüsusilə önəmli hesab etdiyiniz bir partiya varmı?
-Düşünürəm ki, ən vacib qarşılaşma səkkizinci turda Şimali Makedoniyadan olan Yevqeni Romanova qarşı oynadığım partiya idi. Çətin vəziyyətə düşmüşdüm, amma tapdığım bir taktiki ideya oyunun gedişini tam dəyişdi. Bu qələbə mənə böyük emosional güc verdi və liderliyə yüksəlməyimi təmin etdi.
-"Ganja Open"ə hazırlığınız necə idi?
-Hazırlıq kompleks şəkildə aparılıb. Debüt praktikasına çox vaxt ayırmışdım, xüsusilə də Azərbaycan şahmat məktəbində tez-tez istifadə edilən xəttlərə. Bundan əlavə, psixoloji davamlılığa da diqqət yetirdim - belə turnirlərdə sona qədər aydın düşünməyi bacarmaq və psixoloji olaraq yanmamaq çox önəmlidir.
-Son turdan əvvəl yarım xal fərqlə lider idiniz. FIDE təmsilçisi İlya İlyuşenoka qarşı son tur partiyanız heç-heçə ilə başa çatdı. Bu nəticə sizin üçün çempionluq heç-heçəsi oldu?
Məsuliyyəti hiss edirdim. Heç-heçənin mənə sərfəli olduğunu anlayırdım, amma oyunu sadəcə müdafiə üzərində qurmaq istəmirdim. Nəticədə dinamik bir oyun alındı və sülhlə başa çatdı. Son gedişlər xüsusilə həyəcanlı idi.
-Gələcək turnir planlarınız nələrdir?
İndi bir qədər dincəlmək və partiyaları təhlil etmək istəyirəm. Sonra isə bir neçə böyük turnirə hazırlıq başlayacaq. Məqsədim inkişaf etmək, reytinqimi artırmaq və dünya şahmatının elitasına düşməkdir.
Zəki Feyzullayev
