Idman.biz
Azərbaycan Alpinizm Federasiyasının baş katibi Sənan Rəsulov 2028-ci ildə Los-Ancelesdə keçiriləcək Yay Olimpiya Oyunlarına vəsiqə qazanmaq uğrunda hazırlıqların detalları barədə məlumat verib
Sənan Rəsulov "İdman.Biz"lə söhbətində yarışlara hazırlıq mərhələsində Ekologiya və Təbii Sərvətlər Nazirliyinin dəstəyinin əhəmiyyətini vurğulayıb.
Rəsulovun sözlərinə görə, idmançılar beynəlxalq turnirlərdə fəal iştirak edir, təcrübə toplayırlar, həmçinin ölkə çempionatları və məşqlər tam şəkildə idman dırmanması üçün zəruri avadanlıqlarla təmin edilmiş ixtisaslaşmış zalda keçirilir.
"İdmançılarımız beynəlxalq turnirlərdə də iştirak edirlər, çünki Olimpiya Oyunlarına düşmək üçün təcrübə toplamaq vacibdir. Biz bu ixtisaslaşdırılmış, idman dırmanması üçün xüsusi avadanlıqlarla təchiz olunmuş məkanda həm məşq edirik, həm də daxili yarışlar təşkil edirik.
Bəli, zal Ekologiya və Təbii Sərvətlər Nazirliyinin balansında olsa da, nazirlik onu federasiyanın istifadəsinə qarşılıqsız təqdim edib. Bundan əlavə, bizə müəyyən maliyyə dəstəyi də göstərir", – deyə Sənan Rəsulov qeyd edib.
Xatırladaq ki, Azərbaycan Alpinizm Federasiyasının prezidenti Muxtar Babayev əvvəllər Ekologiya və Təbii Sərvətlər naziri vəzifəsini tutub.
Vüqar Vüqarlı
