Idman.biz
Ər-Riyadda VI İslam Həmrəyliyi Oyunları davam edir. Bir sıra idman növlərində medal uğrunda mübarizə hələ başlanmayıb, digərlərində isə artıq başa çatıb.
Azərbaycan yığması üçün ilk nəticələrin yekunlaşdırıla biləcəyi növlərdən biri karate oldu. Komandanın çıxışı barədə İdman.Biz Azərbaycan Karate Federasiyasının vitse-prezidenti Rəhman Hətəmovdan münasibət öyrənib.
Hətəmovun sözlərinə görə, son aylar yığma üçün son dərəcə gərgin keçib:
"Son iki ayda qrafikimiz çox yüklü idi. Əvvəl MDB Oyunları, sonra dünya çempionatının lisenziya turniri, indi İslamiyadadır, noyabrın sonunda isə Misirdə dünya çempionatı var".
O vurğuladı ki, komanda İslamiadaya tam heyətlə yollanmalı idi, lakin təşkilat komitəsinin qərarı ciddi dəyişikliklərə səbəb olub:
"Biz tam heyətlə - kumitedə beş kişi və beş qadın, katada isə bir idmançı ilə getməyi planlaşdırırdıq. Amma sonra təşkilat komitəsi qaydaları dəyişdi və heyəti tam olaraq yarıya qədər azaltmağa məcbur olduq. Karate üzrə əsas rəqiblərin Səudiyyə Ərəbistanı, Misir, İordaniya olduğunu nəzərə alsaq, mübarizə ikiqat çətinləşdi".
Hətəmov komandanın medal şanslarına təsir edən kadr itkisi barədə də danışdı:
"Yığmanın kapitanı Asiman Qurbanlının olmaması çox hiss olundu. O, yarışların əvvəlində zədələndi. Buna görə də planlaşdırdığımızdan az medal qazandıq. Bundan əlavə, Mədinə Sadıqova və Roman Heydərov açıq şəkildə yarımfinalda haqsızlıqla uduzdular. Turqut Həsənova isə artıq ilk döyüşdə İordaniyadan dünya reytinqinin birinci nömrəsi rəqib gəldi".
Yığmanın çıxışını yekunlaşdıran Hətəmov qeyd etdi ki, nəticə xeyli yüksək ola bilərdi:
"Biz cəmi üç medal qazandıq — bir qızıl və iki bürünc. Halbuki dediyim kimi, daha çoxunu ala bilərdik".
