Idman.biz
Azərbaycan Kanoe və Avarçəkmə Federasiyası (AKAF) mətbuat konfransı keçirib.
İdman.Biz xəbər verir ki, tədbirdə Gənclər və İdman Nazirliyi İdman şöbəsinin müdiri Elnur Məmmədov, AKAF-ın baş katibi Fərhad Əliyev və Qlobal Kanal Avarçəkmə Aksiyasının səlahiyyətli nümayəndəsi Ken Li iştirak ediblər.
Tədbir iştirakçıları media nümayəndələrini Zəfər Günü və Dövlət Bayrağı Günü münasibətilə təbrik edib, Ali Baş Komandan İlham Əliyevin rəhbərliyi ilə Azərbaycan ordusunun qazandığı qələbənin tarixi əhəmiyyətini vurğulayıblar.
Ken Li çıxışı zamanı ötən il Bakıda COP29 ərəfəsində "Təmiz suda avar çək" devizi ilə keçirilən avarçəkmə yürüşündən danışıb. Qeyd olunub ki, aksiyanın məqsədi ekoloji problemlərə diqqət çəkməkdir. Aksiya bu il COP30 çərçivəsində Braziliyanın Belem şəhərində davam edəcək və ümumilikdə dünyanın 100 şəhərini əhatə edir.
Konfransda həmçinin federasiyanın 2025-ci ildəki nəticələri açıqlanıb. Bildirilib ki, il ərzində AKAF tərəfindən "Mingəçevir Reqatası" və "Prezident Kuboku" kimi beynəlxalq yarışlar keçirilib. Yarışların bir hissəsi Qarabağda — Füzulidə Köndələnçayda və Ağdərədə Suqovuşanda təşkil olunub.
Avarçəkənlər ötən mövsümdə müxtəlif yarışlarda 8 qızıl, 17 gümüş və 17 bürünc olmaqla ümumilikdə 42 medal qazanıblar.
Mətbuat konfransından sonra 100-dən çox avarçəkənin Xəzər dənizində kayak, kanoe, akademik avarçəkmə və draqon qayıqlarında nümayiş xarakterli çıxışları keçirilib.
