Idman.biz
Prodüser və Yevgeni Plyuşenkonun akademiyasının həmsahibi Yana Rudkovskaya rusiyalı fiqurlu konkisürən Veronika Jilinanın Azərbaycanı mümkün təmsil etməsi ilə bağlı fikirlərini bölüşüb.
İdman.biz xəbər verir ki, daha əvvəl Olimpiya çempionu Aleksey Yaqudin Jilina və digər fiqurlu konkisürən Sofya Samodelkina arasında keçid baxımından fərq görmədiyini bildirmişdi.
Samodelkina ötən mövsümdən Qazaxıstanı təmsil edir. Jilina isə Azərbaycan millisində çıxış etmək istədiyini bəyan edib, lakin Rusiya Fiqurlu Konkisürmə Federasiyası (FFKKR) onun keçidini təsdiqləməyə tələsmir.
Rudkovskaya həqiqəti dediyinə görə Yaqudinə təşəkkür edərək Jilina ilə bağlı fikirlərini bölüşüb: "Bu qız çox ciddi bel zədəsi almışdı, uzun müddət müalicə və reabilitasiya keçdi. Heç kim bu haqda hər yerdə car çəkmədi! Bu, şou-biznes deyil, idmanda bu cür şeylər adət deyil.
O, 875 gün ərzində Rusiyada heç bir yarışda çıxış etməyib, valideynləri dövlətin onun üçün çəkdiyi bütün xərcləri tam şəkildə geri qaytarıblar. Dövlət ona buz meydançanın kirayəsini ödəməyib, o, bizim Yevgeni ilə birgə maliyyələşdirdiyimiz şəxsi akademiyamızda məşq edirdi. Onun Azərbaycan pasportu var və bir ildən çoxdur ki, başqa ölkənin rezidentidir.
2023-cü ilin dekabrında o, FFKKR-ə başqa ölkəyə keçmək istədiyini bildirdi. Rəhbərlik ona düşünməyi, hər şeyi ölçüb-biçməyi və müalicə olunmağı təklif etdi: bu məsələdə heç bir iradımız yoxdur, onlar öz idmançılarını atıb getmirlər. Amma tarixdə 870 günlük "karantin" nümunəsi olmayıb. İdmançı artıq idman vətəndaşlığı ilə bağlı seçim edib.
Keçidlər hər zaman olub, var və olacaq. Mən Veronikaya sağlamlıq və ancaq qələbələr arzu edirəm. O bilir ki, bizim ailə onu heç vaxt tək buraxmayacaq və onun yanında olacaq - yaxın gələcəkdə onun idman vətəndaşlığı ilə bağlı hansı qərar qəbul edilməsindən asılı olmayaraq".
İdman.biz
