Idman.biz
Türkiyənin "Qalatasaray" klubu qış transfer pəncərəsində heyətində ciddi dəyişikliklər edə bilər. İstanbul təmsilçisinin beş futbolçu ilə yollarını ayırmaq imkanını nəzərdən keçirdiyi bildirilir.
İdman.Biz Türkiyənin "Sözcü" qəzetinə istinadən xəbər verir ki, klub rəhbərliyi Leroy Sane, İlkay Gündoğan, Lesli Uqoçukvu, El Şaday Bitşiabu və Kaan Ayhanın gələcəyini müzakirə edir.
Məlumata görə, bu beş futbolçunun cari mövsümdə qol və məhsuldar ötürmə ilə fərqlənməməsi onların komandadakı mövqeyini zəiflədib. Üstəlik, oyunçuların yüksək maaşları klub üçün əlavə maliyyə yükü yaradır.
Siyahıdakı futbolçular arasında ən çox qazanan Leroy Sanedir. Almaniyalı vingerin illik zəmanətli maaşı doqquz milyon avro, sədaqət bonusu isə üç milyon avrodur. İlkay Gündoğan ildə 4,5 milyon, Lesli Uqoçukvu 2,65 milyon, El Şaday Bitşiabu iki milyon, Kaan Ayhan isə təxminən 1,8 milyon avro qazanır.
Beləliklə, beş futbolçunun illik sabit maaşlarının ümumi məbləği təxminən 20 milyon avroya (37,5 milyon manat) çatır. Bu hesablamaya Sanenin əlavə sədaqət bonusu daxil deyil.
Ayrılığa ən yaxın futbolçular Uqoçukvu və Bitşiabu hesab olunurlar. Mövsümün əvvəlində icarəyə götürülən hər iki oyunçunun müqaviləsinə yanvarda vaxtından əvvəl xitam verilməsi planlaşdırılır.
İstanbul klubu Bitşiabunun icarəsi üçün RB Leypsiqə iki milyon avro, Uqoçukvu üçün isə İngiltərənin "Bernli" klubuna üç milyon funt sterlinq ödəyib. Buna baxmayaraq, rəhbərliyin onların mövsümün ikinci yarısında komandada qalmasına isti yanaşmadığı bildirilir.
Sane, İlkay Gündoğan və Kaan Ayhanla bağlı vəziyyət isə fərqlidir. "Qalatasaray" bu futbolçularla müqavilələrə dərhal xitam vermək niyyətində deyil. Lakin münasib transfer təklifi daxil olarsa, onların komandadan ayrılmasına şərait yaradıla bilər.
Ən çox diqqət çəkən məqamlardan biri Sanenin gələcəyidir. Almaniyalı futbolçunun ehtiyat oyunçular skamyasında qalmasından narazı olduğu bildirilir. Onun təmsilçi şirkətinin hüquqşünaslarının "Ştutqart"la Çempionlar Liqası matçından əvvəl İstanbulda danışıqlar apardıqları iddia olunur.
Sanenin xidmətində ABŞ-ın MLS çempionatının klubları da maraqlıdır. Məlumata görə, 30 yaşlı futbolçu hazırkı qazancına yaxın maliyyə şərtləri təklif ediləcəyi təqdirdə ABŞ-yə köçməyə müsbət yanaşa bilər.
Qeyd edək ki, beş futbolçunun gələcəyi ilə bağlı hələlik "Qalatasaray" tərəfindən rəsmi qərar açıqlanmayıb.
