Sport24.az
"Brayton" "Atletiko Mineyro"nun 18 yaşlı mərkəz müdafiəçisi Vitao Teşeyra üçün rəsmi transfer təklifi etməyi planlaşdırır. Sport24.az xəbər verir ki, bu barədə Braziliyanın R7 portalı məlumat yayıb.
İngiltərə klubu qarşı tərəfə 14 milyon avro ödəməyə hazırdır. Braziliyalı oyunçuya "Everton" və "Real" da maraq göstərir.
"Brayton"un qış "transfer pəncərəsi"ndə müdafiəçini heyətinə qatmağa çalışacağı gözlənilir. Vitaonun xarici klublar üçün müəyyən edilmiş sərbəst qalma məbləği (təzminat) 20 milyon avro təşkil edir.
Müdafiəçinin transfer hüquqlarının 80 faizi "Atletiko Mineyro"ya məxsusdur, qalan 20 faizi isə oyunçunun özü və onun agentləri – Linkoln və Adriano Spadoto arasında bölünüb.
Braziliya klubu oyunçu ilə maaş artımını və daha yüksək sərbəst qalma məbləğini nəzərdə tutan yeni müqavilə bağlamaq üçün danışıqlar aparmağa çalışıb. Lakin bu danışıqlar dayanıb. Hazırda Vitao ayda 25 min Braziliya realı qazanır ki, bu da Braziliya A Seriyasında çıxış edən oyunçuları arasında ən aşağı maaşlardan biridir.
Qeyd edək ki, Vitao cari mövsümdə "Atletiko Mineyro"nun heyətində 16 oyuna çıxıb və bir qol vurub.
