Idman.biz
PSJ-nin gürcüstanlı futbolçusu Xviça Kvaratsxeliya həmyerlisi Saba Lazişvilinin RAF 14 turnirində qazandığı qələbəyə münasibət bildirib.
İdman.Biz xəbər verir ki, 21 yaşlı sərbəst güləşçi yarışda UFC çempionluğuna keçmiş namizəd, 46 yaşlı amerikalı Yurayya Feyberlə qarşılaşıb və 12:7 hesabı ilə qalib gəlib.
RAF liqasındakı debüt görüşünü qələbə ilə başa vuran Lazişvili Kvaratsxeliyanın da diqqətini çəkib. Gürcüstan millisinin üzvü həmyerlisini təbrik edərək onun çıxışından qürur duyduğunu bildirib:
"Biz qalib gəldik, dostum! Gəlin, Sabanı təbrik edək. O, Gürcüstan bayrağı ilə əsl əfsanədir. Allah səni qorusun, qardaş!"
Lazişvilinin qələbəsi bir neçə gün əvvəl Əbu-Dabidə baş vermiş kütləvi dava fonunda xüsusi diqqət çəkib.
Noyabrın 11-də PFL-in yüngül çəkidə məğlubiyyətsiz çempionu Usman Nurmaqomedov müsahibə verən Merab Dvalişviliyə yaxınlaşaraq ona sillə vurub. Bundan sonra Dvalişvili və dostu Lazişvili ilə Nurmaqomedov və onun komanda yoldaşları arasında dava düşüb.
Hadisədən sonra qarşıdurmanın iştirakçıları hüquq-mühafizə orqanları tərəfindən saxlanılıblar.
Kvaratsxeliya daha əvvəl də Dvalişvili və Lazişvilini açıq şəkildə dəstəkləyərək qarşı tərəfin hərəkətlərini tənqid etmişdi. Bu açıqlamadan sonra Həbib Nurmaqomedovun sosial şəbəkədə gürcüstanlı futbolçunu izləmədən çıxardığı bildirilmişdi.
