Idman.biz
Buzüstü hokkey üzrə dünya çempionatında finalçılar bəlli olub.
İdman.biz xəbər verir ki, İsveç və Danimarkada keçirilən turnirin həlledici matçında İsveçrə və ABŞ komandaları qarşılaşacaqlar.
Yarımfinalda isveçrəlilər Danimarkaya (7:0), amerikalılar isə İsveçə (6:2) aşkar üstünlüklə qalib gəliblər.
Vaxtilə iki dəfə dünya çempionu tituluna sahib çıxmış ABŞ komandasından fərqli olaraq, İsveçrə dörd dəfə finala çıxsa da, qalib gələ bilməyib.
Yeri gəlmişkən, eyni qrupda mübarizə aparan finalçıların bu mundialdakı ilk duelində isveçrəlilər 3:0 hesablı qələbə qazanıblar.
Qeyd edək ki, Stokholmda "Avicii Arena"da keçiriləcək İsveçrə - ABŞ finalı Bakı vaxtilə saat 22:20-də başlayacaq. Saat 17:20-də isə 3-cü yer uğrunda İsveç - Danimarka görüşü start götürəcək.
İdman.biz
