Siqaret qaçaqmalçılığı işində "RR Caspi" MMC-nin əməkdaşları saxlanılıb, Zaur Axundovun şirkətlərinin də adı keçir

Azərbaycanda siqaret qaçaqmalçılığı ilə bağlı aparılan genişmiqyaslı istintaq çərçivəsində daha 3 nəfər saxlanılıb. Sport24.az xəbər verir ki, Baş Prokuror yanında Korrupsiyaya qarşı Mübarizə Baş İdarəsində araşdırılan cinayət işi üzrə axtarışda olan gəmi kapitanı Elşən Əhmədov, matros Amid Sayılov və mexanik Elçin dekabrın 16-da hava limanında tutulublar. Məhkəmənin qərarı ilə onların barəsində həbs qətimkan tədbiri seçilib.

İstintaq materiallarına əsasən, saxlanılan şəxslər "RR Caspi" MMC-nin işçiləridir. Onlar qaçaqmal yolu ilə ölkəyə gətirilən siqaretləri Ələt qəsəbəsində yaradılmış yanalma körpüsünə gəmi vasitəsilə çatdıraraq, oradan 3 yük avtomobilinə yükləməkdə ittiham olunurlar. Qaçaqmalda istifadə edilən gəminin də "RR Caspi" MMC-yə məxsus olduğu bildirilir.

Təqsirləndirilən şəxslərə Cinayət Məcəlləsinin 206.3.2, 213-1.2.1 və 213-1.2.3-cü maddələri ilə ittiham irəli sürülüb.

Maraqlı məqamlardan biri də odur ki, cinayət işi üzrə "Səmayə Co LTD" MMC və "Səmayə Logistic" MMC-nin adları da istintaqda keçir. "Səmayə Co LTD" MMC Azərbaycan Futzal Federasiyasının və Naxçıvan Futbol Federasiyasının prezidenti Zaur Axundova məxsusdur.

İlkin hesablamalara görə, dövlətə dəymiş ziyanın məbləği 2 milyon manatdan çoxdur.

Xatırladaq ki, bu cinayət işi üzrə daha əvvəl Dövlət Sərhəd Xidmətinin Sahil Mühafizəsində vəzifə tutan şəxslər – bölmə rəisi Vüsal Sadıqov və bölmənin nəzarətçisi də saxlanılıb, barələrində qətimkan tədbirləri seçilib.

İstintaq tədbirləri davam etdirilir.