Idman.biz
Fövqəladə Hallar Nazirliyinin İdman-Sağlamlıq Klubunda (FHN İSK) taekvondo üzrə Azərbaycan birinciliyi keçirilib.
İdman.Biz shimal.news.az-a istinadən xəbər verir ki, yarışda Quba komandası altı idmançı ilə iştirak edib və uğurlu nəticələr əldə edib.
Gənclər arasında keçirilən görüşlərdə qubalı taekvondoçular üç medal qazanıblar. 45 kq çəki dərəcəsində çıxış edən Əlimurad Rzayev gümüş medal, 44 kq-da mübarizə aparan Məryəm Cəfərova bürünc, Humay Dadaşova isə qızıl medalın sahibi olub.
Böyüklər kateqoriyasında da Quba idmançıları fəxri kürsüyə yüksəliblər. 80 kq çəki dərəcəsində Xanlar Xanəhmədov gümüş medal qazanıb. 54 kq-da çıxış edən Səyyad Dadaşov isə bütün rəqiblərini məğlub edərək qızıl medala layiq görülüb.
Qeyd edək ki, Səyyad Dadaşov bu nəticə ilə artıq 9-cu dəfə Azərbaycan çempionu olub.
Quba komandasının məşqçisi idman ustası, əməkdar məşqçi Tural Vəlibəyovdur.
